“Cultura Libre”, una atra traza de fer as cosas

Un libro disco que reflexiona sobre a propiedat intelectual y a cultura libre

Portalada

Baixo o titol de “Cultura Libre”, plega o primer libro disco editau por Magofermin a on que se pueden trobar 24 temas (14 d’ells de tot ineditos) de collas como Mallacán, Prau, Gen, Visión Túnel, Interlude, Picore u Los Draps, entre atros, que vienen acompanyadas por un libro de 104 pachinas a on que as collas que i participan fan conoixer a suya anvista sobre os dreitos d’autor y a suya chestión en a sociedat d’agora.

Antimás, o texto tamién conta con alportacions de José Manuel Dorado (miembro de La Pantera Rossa, prochecto endrezau enta l’acción cultural y compromeso con a economía social y solidaria), Ignasi Labastica i Juan (miembro destacau d’o prochecto de Creative Commons en Catalunya y Espanya), Javier Prenafeta (advogau especialista en Tecnolochías d’a Información y a Comunicación), Eme Navarro (fundador d’o prochecto colectivo y multidisciplinar: La Taberna del Escocés, mosico de Blue Identity y autor de cantas) y as ilustracions de Fer (Prau)

O prochecto, que prencipió pensar-se fa meses, une a todas as collas que han editau os treballos suyos baixo lo siello Magofermín y, prou que sí, con licencias libres. Ixas dos caracteristicas son o filo que une as costuras de “Cultura Libre”, un prochecto a on que no nomas se puet ascuitar a mosica de qui bi participa, sino que tamién se puet conoixer-ie a suya traza d’entender iste concepto.

Vintiquatre collas (Gen, Big Head Down, Prau, Interlude, Txirigol, Visión Túnel, Mallacán, Inkonszientes, Déchusban, Picore, Zobux, Criatura, Temps al temps, Rottenmeyer and the Psychopunks, Rapsodia, Ya Babé, Los Draps, Rebel Spell, Himura, El Último Skalón, Switch Over, Los Olvidados de la Morgue, Ulut y Abraham Castellón) han participau en a realización d’iste prochecto, alportando-ie no nomas as cantas suyas (14 d’ellas de tot ineditas y grabadas de propio ta iste prochecto, sino que antimás han teniu a valura de meter por escrito os suyos pensamientos cuanto a l’afer d’a cultura libre y que son os alazetz principals d’un libro trilingüe a on que tot o suyo conteniu se puet leyer en castellano, catalán y aragonés, igual como entre os temas i trobamos cantas con letras en istas tres luengas. En iste sentiu cal sinyalar que iste prochecto no hese plegau a fer-se sin a colaboración en as traduccions a l’aragonés de Rubén, Chesús y Dabi y de Rubén Lombarte y Marc Martí a lo catalán. Tamién Óscar (Malecon Records) tien a suya chicota parti de culpa en a realización d’o disco.

Ta rematar, y encara que nian cal decir-lo, cal apuntar que tanto o libro como o dusco se han editau baixo una licencia Creative Commons Reconoiximento-NoComercial-CompartirIgual (by-nc-sa)

Fuent: http://arainfo.org/2012/01/%e2%80%9ccultura-libre%e2%80%9d-otra-forma-de-hacer-las-cosas/

Una rispuesta a “Cultura Libre”, una atra traza de fer as cosas

  1. Dabi Lahiguera

    A veyer quan me lo compro y finacion librement a cultura que quiero.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.