“Stop desahucios” se manifestará ta reformar a lei hipotecaria

Planteyan cambeos en as leis hipotecarias ta escusar que a chent siga forachitada de casa suya

A Plataforma “Stop desahucios”, creyada t’aduyar a os afectaus por o desaloix d’as viviendas suyas, se manifestará o venient 25 de setiembre ta promover cambeos en a lei hipotecaria. Dende o movimiento s’apuesta por tres iniciativas que, solucionarían parti d’o problema.

O movimiento “Stop desahucios” compuesto por diferents asociacions y chent d’o 15M, preba de “dar un empentón a la fin a la lei hipotecaria”. Asinas lo ha dito Pablo Híjar, component d’a plataforma. Antimás ha proposau tres midas que “darían una solución a escape” a lo problema d’as viviendas.

Establir la dación en pago con carácter retroactivo ta liberar a toda aquellas familias “d’una carga que ye de dar que les ye arrocegando” sería a primer d’as midas que s’habrían de replegar en qualsiquier cambeo que se fese en a lei hipotecaria. Iste remeyo facilitaría que as mils de familias que son estadas forachitadas de casa suya deixasen de tener una deuda con as entidaz bancarias.

Antimás, Híjar ha planteyau que no se forachita de casa suya a las personas que, por qüestions economicas, no puedan concarar as hipotecas. “Os
bancos habrían d’establir, por lei, una moratoria en o pago d’ixas hipotecas u una gradualidat en o pago suyo”, ha esplanicau.

Ta rematar, o integrant d’o movimiento ha planteyau una tercer alternativa que habría de contemplar-se en a lei hipotecaria. Ista pende en que “tot ixe paruqe de viviendas nuevas, executadas y vuedas, pase a titularidat publica ta fer un parque de loguero” ha comentau.

Ta reivindicar todas istas alternativas “Stop desahucios” ha convocau una chornada de movilizacions a ran estatal en a más gran parti de capitals de provincia o venient 25 de setiembre. A manifestación de Zaragoza prencipiará en a Glorieta Sasera a las 19.00 horas. Dende o movimiento s’ha feito un clamamiento a os ciudadans ta refirmar a los afectaus porque “lo important d’ista campanya ye comprender que hue ye uno, maitin l’atro y que hemos d’estar-ie hue por tu y maitín por yo”, ha comentau Híjar. Dende iste diya, iste movimiento ferá más intensa a suya actuación en os
vicos.

Movimiento vecinal en Delicias.

O movimiento “Stop desahucios” tamién treballa en os diferents vicos de Zaragoza. En o caso de Delicias, ista asambleya ha teniu un especial importancia t’a escusar que forachitasen a la mai de Pablo García, que o venient 23 de setiembre habría d’entregar a casa suya y la de su mai con un 33 % de discapacidat.

“Me pareix correcto que por no pagar una deuda me sacasen o piso mio, pero que tamién lo fesen con casa de mai por haber-me avalau, no
pas”, ha explicau. Gracias a lo movimiento de Delicias, que mientres as fiestas d’o vico espardió a situación entre o vecinamen, Pablo ha plegau a un “prencipio d’alcuerdo” con o BBVA. O diya 23, como yera previsto a entidat bancaria se quedará con a casa suya, “tal y como yo les heba ufierto”, pero que “o de mai se aturaba y plegaríanos en negociacions posteriors”.

Dica agora, Pablo no conoix quals serán istas negociacions, encara que sabe que “antis u dimpués iste piso será d’o banco”. Por a suya parti, ufrirá a la entidat bancaria un “loguero en condicions a una pensión que tien mi mai de 600 euros y deixar-la vivir dica que se muera y ixe diya que se queden con o piso”.

Seguntes l’alcuerdo en o que pleguen entre o BBVA y l’afectau, s’aturarán todas as actuacions y sino o 15M “continará enta debant a por todas”. Encara tamién ha remerau Híjar que “son muitos pocos los que gosan fer o zaguer trango ta que les aduyemos y ixo pende de l’afectau”. Por isto, Pablo anima a la chent a que se “saquen o velo” ta denunciar ista mena de situacions y prebar de meter-les remeyo.

Fuent: http://www.aragon2.com/n-12785-3-Stop_desahucios_manifestara_para_reformar_hipotecaria

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.