1.200 esquiadors evacuaus d’a estación de Pandicosa

Dica 1.200 esquiadors han estau rescataus en a estación d'esquí de Pandicosa debiu a las fuertes airadas de mesmo 110 km/h

Aramón_Panticosa_Telecabina

Telecabina d’a estación de Pandicosa. Foto: Wikipedia

Servicios de rescate (Guardia Civil, bombers, Cruz Roya, DYA, personal d’Aramón, Protección Civil y vecins de localidatz como Foz de Chaca u Pandicosa) han habiu de rescatar mientres ahiere y ista nueit a os 1.200 esquiadors que quedoron atrapaus en a estación hibernal d’esquí debiu a las fuertes airadas de 110 km/h que bufaban en o citau puesto y que obligoron a zarrar os remontes.

L’operativo prencipió ahiere miercols a las 15 h. d’a tardi y ha rematau a las 8:30 h. d’iste maitín, an que han treballau sin descanso unas 200 personas. As personas rescatadas han estau trestalladas en collas de 50 personas y han baixau dica a zona de Selva Verda (1.500 m. d’altaria) en maquinas chafa-pistas, y dende ista zona en o telesilla Santa Cruz que comunica ista zona con a base d’o telecabina d’a estación.

As personas evacuadas yeran atendidas en tot momento por o personal d’a estación y Protección Civil, en l’aria de Petrosos. Entre ellas, destacar a presencia d’o lider d’o PP en o País Vasco, Antonio Basagoiti, rescatau chunto a la suya filla. A operación s’ha desembolicau con tranquilidat.

Aramón y a estación d’esquí de Pandicosa han demandau sincusas debiu a l’inasperau cambeo d’orache, y a estación permaneixerá zarrada hue a lo menos como mida de seguridat ta revisar l’estau d’a mesma dimpués d’o temporal d’aire.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.