15 d’octobre, o mundo en a carrera contra o sistema

En o país bi'n ha convocadas manifestacións en Zaragoza, Uesca, Teruel, Andorra, Monzón u Alcanyiz

Cartel global d'a convocatoria

Cartel global d'a convocatoria

Por un cambeo global en o planeta o mundo sale huei ta la carrera. En más de 90 paises, en más de 800 ciudatz y lugars, os ciudadans prenerán as carreras ta demandar un cambeo en as relacions economicas, politicas y socials. En o nuestro país bi’n ha convocatorias en 6 ciudatz que s’adhiben a la convocatoria global.

En Zaragoza a convocatoria ye a las 6 d’a tardi en Glorieta Sasera, encara que tamien i habra columnas que partiran d’os esferents vicos d’a ciudat. En Sant Chusé han quedau en a Plaza Mayor a las 17. A ixa mesma hora s’achuntaran en as Delicias en a plaza d’a Convivencia, en Universidat, en Plaza Sant Francisco y os integrants d’a masa cretica en bici. A las 17:15 a chent d’o Gancho y l’Almozara han quedau en a plaza Santo Domingo, y os d’a marguin cucha, en a carrera Sobrarbe. A la fin, a chent de Torrero ha quedau a las 17.30 en As Canteras, t’achuntarse totz en a convocatoria prencipal en Glorieta Sasera a las 18.

A la cita de Zaragoza acudira tamién la chent de Monzón, que han quedau a las 12 ta fer una concentración y dimpués a las 16 ta salir enta Zaragoza.

En Uesca la cita ye en Plaza Navarra a partir d’as 17 horas, encara que la manifestación no prencipiará dica las 20, de conchunta con atras muitas ciudatz europeas.

A plaza Sant Chuan ye o punto de trobada d’os manifestants de Teruel. Será a las 18 y a la manifestación s’adhibe una pucherada.

A las 19 ye convocada a concentracion-manifestación d’Alcanyiz, en a plaza Espanya. En Andorra, más maitinadors, s’achuntan a la 13 en a plaza d’o Regallo ta “romper” con a crisis, y animan a levar cualsiquier traste ta fer-lo sonar.

2 Rispuestas a 15 d’octobre, o mundo en a carrera contra o sistema

  1. Yo iré hué ta la manifestación de Zaragoza. Me ferá goi veyer muita chent astí. A la fin as chents d’o mundo rebellan d’a suya modorra y s’esbellugan una mica. Mai no ye tardi.

  2. aspero que la chent no s’amodorre con ixo d’as fiestas y bi vaiga. yo voi !!

Responder a Alex Cancelar respuesta

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.