16 personas detenidas en una nueva operación d’a Guardia Civil contra a cucha abertzale

Dotze d'as deciséis personas detenidas son advogaus. A Guardia Civil espanyola ha requisau os diners replegaus en a manifestación d'o pasau sabado en favor d'os dreitos d'os presos vascos

Foto: Wikipedia

Audiencia Nacional. Foto: Wikipedia

Deciséis personas han resultau detenidas hue por a Guardia Civil espanyola en diferents localidatz d’o País Vasco, Nabarra y Madrit en una nueva operación contra a cucha abertzale. Dotze d’estas personas son advogadas de presos vascos. Tres d’estes advogaus han estau detenius en Madrit do paraban a defensa de 35 militants d’a cucha abertzale que iban a estar chudgaus hue por l’Audiencia Nacional espanyola. O chuicio s’ha suspendiu debiu a esta situación que deixaba sin defensa a os acusaus. Amás, o senador d’EH Bildu Iñaki Goioaga ha resultau tamién imputau pero no ha estau deteniu debiu a la suya condición d’aforau.

Seguntes o Ministerio d’Interior espanyol, os delitos que s’imputan a estas personas serían “integración en banda armada” y “delitos contra a Hicienda publica“. O ministerio argumenta que os advogaus “exerceban o control sobre os presos d’ETA, tresladando as directrices d’a banda y anteponendo os intreses ‘politicos’ y estratechicos d’a organización terrorista a la defensa churidica y os intreses personals d’os reclusos”.

Os delitos economicos, seguntes Interior, se deben a “no haber declarau a o fisco unos ingresos superiors a 1.300.000 euros mientres os anyos 2012 y 2013, procedents de l’asistencia churidica a miembros d’o colectivo de presos d’ETA (EPPK)”. Interior considera que s’ha desarticulau “o entramado financiero que sustentaba economicament a o colectivo d’advogaus“.

Esta operación (Operación Mate) ye complementaria a las redadas de setiembre de 2013 y chinero de 2014 contra Herrira, que acaboron con 26 detencions en total.

Dende as 7 horas d’o maitín s’ha procediu, amás d’as detencions, a o rechistro policial de diferents despachos d’advogaus, “herriko tabernas” y a siede de LAB, sindicato vasco, en Bilbau. En esta zaguera siede, a Guardia Civil ha requisau os diners recaudaus o pasau sabado en a manifestación en apoyo a os dreitos d’os presos vascos y en contra d’a dispersión. Diversas organizacions vascas demandan a devolución d’ixos diners. Dende Sare, han explanicau, que estos diners replegaus en una movilización legal, teneban como obchectivo “l’abono d’os gastos cheneraus en a organización d’esta movilización ciudadana“.

S’ha produciu una ripa de reaccions contrarias a esta operación, no nomás en os despachos, sino tamién en concentracions ciudadanas en o País Vasco, asinas como en os retz socials, Twitter y Facebook fundamentalment, fendo servir mas que mas os hashtags #JeSuisBasque y #AbokatuakLibre.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.