18 detenius por delitos contra as institucions d’o Estau por protestar contra os desfiuzamientos

Son acusaus d'extender una pancarta mientres o pleno d'a Chunta Municipal de Moratalaz en que se leyeba 'Ni casas sin chent, ni chent sin casas'

Fotograma d'o vidiode Juan Carlos Mohr. (CC-BY)

Fotograma d’o vidio de Juan Carlos Mohr. (CC-BY)

“A las 7,30h han veniu dos policías secretas. Primer m’han dito que se levaban a o mío fillo como testigo y que en dos horas sería difuera, pero siguen dentro”, explica una d’as mais d’os 18 chovens detenius hue en Madrit. Seguntes confirma a Diagonal Erlantz Ibarrondo, son acusaus de delitos contra institucions d’o Estau, pero dica agora no ha teniu acceso a mas información. L’advogau sinyala que ha estau citau a las 12h ta asistir a os detenius, que actualment son en a comisaría de Moratalaz. 15 d’os detenius son miembros d’o colectivo Distrito 14 y atros dos de Frent 202, seguntes afirman totz dos colectivos en retz socials.

Os 18 son acusaus de delitos contra o Estau por protestar contra os desfiuzamientos, o pasau 17 de febrero, entre a celebración d’o pleno d’a Chunta Municipal de Moratalaz, explica o pai d’unatro d’os detenius. Os chovens fuoron feitos fuera d’o pleno dimpués d’extender una pancarta en que se podeba leyer ‘Ni chent sin casas, ni casas sin chent’, seguntes amaneixe en un vidio gravau por Juan Carlos Mohr.

Un d’os chovens, de 19 anyos, ya fue deteniu entre o desaloixo y espaldo d’a vivienda d’Ofelia Nieto 29. Seguntes explica a suya mai, en ixa ocasión “a policía le dio un truco en a cabeza y le arrocegó por tierra”.

En una entrevista en Telecinco, a delegada de Gubierno, Cristina Cifuentes, ha afirmau que os detenius “irrumpioron en o pleno y ‘se armó la marimorena’. I habió agresions”. As declaracions de Cifuentes han estau desmentidas por quantas personas que fuoron testigos d’a protesta en o pleno d’a Chunta.

Os familiars afirman que a operación policial ya ha estau zarrada con as 18 detenciones. A policía habría buscau a una persona mas, explican, pero ista zaguera persona no ha estau localizada en o suyo domicilio en estar de viache.

L’articlo 505 d’o Código Penal contempla penas de seis meses a un anyo de prisión ta aquells, “sin estar miembros d’a corporación local, perturben de forma grieu o desenrollo d’os suyos plenos empachando l’acceso t’os mesmos, o desenrollo de l’orden d’o día previsto, l’adopción d’acuerdos u causen desordens que tiengan por obchecto manifestar emparo a organizacions u grupos terroristas”. Iste ye o solo articlo d’o capitol de delitos contra institucions d’o Estau en que se sinyala l’Administración local como institución a protecher. Manimenos, os detenius en a operación policial fuoron desaloixaus d’a Chunta de Moratalaz pocos segundos dimpués de desplegar una pancarta, dimpués d’o qual o pleno siguió o suyo desenrollo.

Fuent: https://www.diagonalperiodico.net/libertades/26014-18-detenidos-por-delitos-contra-instituciones-del-estado-por-protestar-contra

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.