2.000 personas demandan a oficialidat de l’asturiano

2.000 personas se manifestón ahiere en a capital asturiana ta demandar a oficialidat d'a suya luenga.

Imachen d'a manifestación. (Foto: Les Noticies)

Seguntes publica o diario dichital Les Noticies, ahiere, viernes 4 de mayo, Día d’as Letras Asturianas, 2.000 personas recorrión as carreras d’o centro d’Oviedo ta reclamar a oficialidat de l’asturiano. L’augua, que acompanyó a os manifestants tot lo recorriu, no fació callar as voces d’a colla de panderetas que ubriba la marcha. Dezaga d’ellos, asociacións, colectivos, partius politicos, sindicatos y sociedat civil amostrón un anyo más o suyo compromiso con a luenga. A la fin d’a manifestación, en a Plaza Porlier d’Oviedo, Paula Cristóbal, en representación d’a Xunta pola Defensa de la Llingua Asturiana (XDLA), leyó un manifiesto en o que dixó platero que a organización que encetó a manifestación reivindicativa va a continar combatindo l’inmovilismo de toda la chent contraria a la normalización y recuperación lingüistica, “clase politica u elite burocratica u economica”, con un mensache bien platero: a reivindicación permanent. A representant d’a organización fació balance d’o zaguer anyo con unas parolas duras: “Iste Día d’as Letras plega dimpués d’un anyo de tiempo perdiu, paralisis y inmovilismo. A nuestra clase politica, que no sabió qué fer con as suyas atribucións y que no querió cumplir os suyos quefers, contina igual como siempre. Con uns nombres u con atros, contina igual como siempre. Y as pocas novedatz, faltaría más, son ta pior, ta ubrir camín a o discurso d’a negación y l’odio, ta negar a chusticia y a evidencia.”

T’a Xunta pola Defensa de la Llingua  “cal treballar ta que l’airera d’a nuestra indignación arrocegue o suyo inmovilismo y a suya achenda oculta de desaparición d’a nuestra luenga. No mereixemos una clase politica que no puede fer que siga legal o que ye de chusticia. A confirmación d’o Tribunal Supremo de que ye ilegal meter un minimo d’alumnos ta dar clase d’asturiano en Secundaria ye a muestra. Habió de venir a chusticia ta decir a os responsables d’Educación anteriors que ixo no ye legal.”

Paula Cristóbal, en nombre d’a Xunta pola Defensa de la Llingua, demandó tamien que o Gobierno futuro cumpla con a lechislación lingüistica vichent, faiga servir a toponimia oficial, cheneralice l’amostranza de l’idioma y guarencie a presencia d’iste en os meyos de comunicación y l’emplego normal en as Administracións. A organización civica tamien demandó una reforma de l’Estatuto d’Autonomía que reculla la oficialidat y reconoixió en o suyo manifiesto que “a crisi economica, amás d’afectar a la pocha y a os puestos de treballo d’a chent, ye repercutindo graument en a industria chicota que fa servir l’asturiano y creye en ello. Que tranquen todas as librerías especializadas u que desapareixca l’unico periodico en asturiano son una preba platera. Amás, os retalles d’as Administracións son cebando-se con a cultura. En o caso de l’asturiano, con un presupuesto ya pobre, a mengua d’as subvencións podría repercutir muit negativament en o sector editorial y mosical en o nuestro idioma, que no puede sobrevivir sin una politica de refirme publico. Amás, a desaparición d’as partidas destinadas a o sector privau y a las entidatz locals afectaría negativament en a concepción social de l’idioma como una luenga valida ta totz os ambitos.”

A tot isto cal sumar, seguntes a organización civica d’esfensa d’os dreitos lingüisticos, “que o Gobierno asturiano contina sin cumplir con a Ley d’Uso y Promoción, que, encara que curta, ye a lechislación lingüistica que bi ha. A recuperación d’a toponimia, que iba china chana, no vidó en ista zaguera lechislatura garra expedient aprebau y a propia Administración no fa servir as formas oficials”. Sobre os meyos de comunicación publicos tamien habió referencias en o discurso leyíu en a Plaza Porlier d’Oviedo. T’a XDLA, “o porcentache d’emisión en asturiano en a RTPA no plega nian a o 2%” y, respecto a o trestallo d’amostranza, una d’as piezas claus de tot proceso de normalización y recuperación d’un idioma, a Xunta remeró que “as circunstancias ya conoixidas de precariedat de l’asignatura son fendo que l’asturiano siga marguinau en todas as etapas imposibilitando que as cheneracións nuevas aprendan l’idioma y deixando a transmisión cheneracional en una situación dramatica”. A intervención se trancó, como ya ye habitual, demandando a oficialidat de l’asturiano.

Fuent: http://www.lesnoticies.com/lesnoticies/noticies/2.000-persones-piden-nes-cais-d%27uvieu-oficialida-del-asturianu/9598

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.