26S: Exito d’a chornada de luita. Aragón no rebla

Ahiere en Aragón, como en atros puntos de l'Estau, yera convocada una chornada de luita en refirme a las vadas chenerals en Euskal Herria y Grecia por meyo d'os sindicatos alternativos y colectivos socials

Foto: Arainfo

O diya de luita prencipió con a memoria en a retina d’a brutal represión policial d’a chornada d’o 25S en Madrit. Nueit d’esveile y rabia por a violencia sobre qui construyen una asperanza de vida igualitaria y chusta.

De maitins os y as universitarias zaragozanas y a Plataforma Stop Desahucios realizaban una marcha estudiantil y concentracions a las puertas d’entidatz bancarias. A las 18.00 horas yeran os cinco sindicatos d’a Mesa Sectorial de conchunta con Marea Verda qui se concentraban en a Consellería d’Educación d’a DChA, a las 19.00 preneba o relevo o sindicato CNT que se concentraba frent a la siede d’o PP d’Aragón, abanzaba a tarde y a las 19.30 numerosas personas plegaban en a Glorieta Sasera convocadas por CATA, CGT, IA y SOA, y dimpués de partir en manifestación plegaban dica a plaza d’o Pilar ta unir-se a las companyeras d’o 15M Zaragoza que dende as 20.00 horas ya s’heban amanau a dita plaza en respuesta a la represión sufrida ahiere en Madrit.

En Teruel, a manifestación convocada por o Bloque Critico (CNT, Purna, CGT y STEA) partiba d’a plaza de Sant Chuan a las 19.30 horas. En Uesca, a la mesma hora, saliba a manifestación dende a plaza de Nabarra con os sindicatos CGT, CNT, SOA-STA y STEA-HUSTE), dimpués d’una concentración convocada por l’Asamblea 15M. Tamién en Chaca se produciba una concentración a las 20.00 horas frent a o Concello.

Aragón, una vegada mas, amostraba a suya solidaridat con a clase treballadera vasca y griega, con os participants represaliaus y detenius en a convocatoria “Rodia o Congreso” y expresaba o suyo rotundo refuse a os retalles en dreitos socials, economicos y nacionals. L’Aragón mas comprometiu tornaba a prener as carreras ta chilar con rotundidat “o capitalismo mata, acabemos con ell”.

CRONICAS D’AS MANIFESTACIONS

AraInfo | Uesca | Convocadas por CNT, CGT, SOA-STA y HUSTE, amán de meyo millar de personas se daban cita en a centrica plaza de Zaragoza uescana ta, posteriorment, partir en manifestación por carreras mas centricas d’a ciudat. Mientres o recorriu, amás de coreyar consignas referents a la situación economica, s’han proferiu chilos de denuncia d’as agresiones policials que ocurrioron en a capital d’o Estau espanyol mientres as movilizaciones d’a chornada d’o 25S, mas que mas en finalizar o recorriu en a subdelegación d’o gubierno, a on a presencia policial yera mas evident.

En o comunicau difundiu, as organizacions sindicals coinciden en que no van a “propiciar l’apuntalamiento d’o sistema capitalista con botanas u midas parcials”, a o contrario, apuestan por a luita y a movilización como “elementos alazetals de transformación social frent a las imposicions d’a “troika” y a las politicas d’os gubiernos que, de chenullos, las asumen y las imposan”.

Tamién refusan as politicas sindicals de concertación social “que tan desastrosas conseqüencias han traito mientres anyos”. Informan que o referendum que solicitan as organizacions sindicals mayoritarias “no puede estar emplegau como elemento retardatario ni moneda de cambeo d’una futura y necesaria vada cheneral, ni como un instrumento de desmovilización, ni muito menos ta solicitar un gubierno de concentración nacional”.

Exichen, antiparti, una auditoría d’a deuda, con responsabilidatz penals si n’i hese, y a derogación de totz os decretos aprebaus mientres os zaguers meses por considerar “que atentan contra os dreitos y as libertatz d’a clase treballadera”.

Finalment planteyan, entre atras midas, no pagar a deuda ni os suyos intreses, no solicitar mas diners ta dedicar-los a o sistema financiero, acazar o fraude fiscal y eliminar qualsiquier mena d’amnistía en ixa linia y anuncian seguir con a movilización convidando a treballadoras, aturadas, estudiants, desahuciadas, immigrants, etc., a participar en os procesos de debat y de luita.

En rematar a mesma s’ha ubierto a megafonía a las asistents, as distintas intervencions han animau a continar con a movilización permanent y s’ha amostrau a solidaridat con as personas detenidas en Madrit, exichir a suya puesta en libertat decamín y denunciando a infiltración d’os cuerpos de seguridat d’o Estau espanyol con “claras intencions de provocar”, seguntes afirmaba una d’as intervencions. S’ha adedicau una especial memoria a Floreal Samitier, historico de l’anarcosindicalismo altoaragonés, trachicament falleciu en accident de trafico.

 

AraInfo | Zaragoza | Coincidindo con a vada cheneral convocada en Euskadi y Nabarra (Hego Euskal Herria) por totz os sindicatos fueras de CCOO y UGT, o sindicalismo alternativo heba organizau una chornada de luita a ran estatal.

En Zaragoza l’acto central yera a manifestación convocada a las 19.30 horas en Glorieta Sasera por os sindicatos CGT, SOA, CATA y IA en “refirme a la vada cheneral en Euskal Herria y en esfensa d’os servicios publicos”. A esferencia de Uesca u Teruel y atras ciudatz d’o Estau espanyol a on CNT se manifestaba con a resta d’o sindicalismo alternativo, en Zaragoza han decidiu de desmarcar-se-ne y convocar a suya propia concentración a las 19.00 debant d’a siede d’o PP en a que han participau unas 400 personas. Una parte d’as y os asistents ha albandonau a concentración ta acudir ta Glorieta Sasera y unas 150 personas con sinyals de CNT s’han manifestau dica a Plaza d’o Pilar coincidindo a final d’o corteixo cenetista con o prenicpio d’a manifestación “unitaria”.

A manifestación d’o sindicalismo alternativo ha reuniu arredol de 3.000 personas encabezadas por a pancarta “Aragón no rebla”. Dende una furgoneta en cabeza se lanzaban consignas por a vada cheneral y por una solución anticapitalista a la crisi. Buen ambient y numerosos corteixos, amás d’os corteixos d’os sindicatos convocants, i heba presencia de collas como Cucha Anticapitalista, PCPE, o colectivo No Pasarán, organizacions d’a cucha independentista (Puyalón de Cuchas, Purna y Universidat) y d’a Marea Verda. En l’ambient yeran as y os detenius y a represión policial en Madrit a vispra. Destacar a presencia d’una nutrida colla d’autobusers con uniforme de treballo, colectivo que yera realizando mientres a chornada atures parcials. A manifestación ha recorriu o cocollo d’o distrito comercial y d’a burguesía de Zaragoza, paseu Constitución dica plaza San Miguel y puyando por o Coso Alto dica a plaza d’o Pilar a on ha confluyiu con quantos cients de personas convocadas por o 15M y a Coordinadora 25S en protesta por a represión policial a l’acción de “Rodia o Congreso”. En tot momento a policía ha escoltau a manifestación, furgonetas por debant y dezaga y achents a piet en os laterals, si bien a suya actitut no ha estau tan agresiva como atras vegadas.

Os convocants han feito una valoración muit positiva sobre a respuesta recibida y anuncian que van a continar movilizando-se contra os retalles.

 

AraInfo | Teruel | Unas 250 personas marchoron por as carreras de Teruel denunciando a ilechitimidat d’a deuda y exichindo o reparto d’o treballo y a riqueza. A o chilo de “Libertat detenius por luitar” u “Teruel entero como os miners” se marchó por as carreras d’o centro dica o Lidl d’a zona d’o Mercau, a on s’han apegau quantos cartels en as suyas puertas con a frase d’Emma Goldman “Demandatz treballo, si no tos lo dan, demandatz o pan, y si no tos dan ni pan ni treballo, pillatz o pan” y s’ha recordau que “hue venimos a demandar o pan, maitín veyeremos”.

Dimpués d’isto se’n ha puyau t’o vico de Sant Lión con lemas como “O venient aturau que sía diputau”, mientres se remeraba a salvache represión policial d’ahiere en Madrit a on estió deteniu entre atros, un companyero de Daroca. A las puertas d’o Mercadona d’a Plaza Mansuetos s’ha leito un texto de denuncia a os supermercaus y as suyas implicacions socials y meyoambientals, y en especial con a politica laboral d’a interpresa de Juan Roig.

De vuelta t’o centro y con proclamas exichindo a reducción d’a chornada laboral sin rebaixa salarial, ha finalizau a manifestación en a Plaza de Sant Chuan, frent a la subdelegación de Gubierno, con un manifiesto a on se reclama “a necesidat d’empecipiar dende ya a construyir una alternativa social y politica, de democracia directa, que esfienda os intreses d’as clases populars”.

Amás dende o portavoz d’o Bloque Critico de Teruel s’ha planteyau “a necesidat de parar una vada dende abaixo, sin as cupulas d’UGT y CCOO, una vada de treballo y de consumo, una vada social y inclusiva que no se quede en l’ature d’un diya”. En dispersar-se a manifestación bells manifestants han estau identificaus y intimidaus por a policía nacional con a sincusa de que heban feito fotos a un policía que s’adedicaba a gravar a os manifestants.

Fuent: http://arainfo.org/2012/09/26s-exito-de-la-chornada-de-luita-aragon-no-rebla/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.