3.987 personas mas ingresan en as listas de l’INAEM en o mes de chinero en Aragón

L'aumento de l'ature, a precariedat en os contractos sinyaus u unas cifras d'afiliación a la Seguridat Social que retroceden a l'anyo 2002 marcan o drama de l'ature en chinero

Oficina de l'INAEM (Foto: D.Ch.A.)

Oficina de l’INAEM (Foto: D.Ch.A.)

114.819 personas son as contabilizadas en Aragón por os Servicios Publicos d’Emplego que son en situación d’ature con a nueva puyada d’ista cifra en o mes de chinero. En o mes pasau 3.987 personas se quedaron sin treballo, un 3,60% mas que no n’i heba en l’anterior mes. Asinas mesmo, respective a o pasau mes de chinero de 2013, son 114 personas mas en l’ature en chinero d’iste anyo.

En as tres provincias aragonesas ha puyau l’ature, 2.923 personas en Zaragoza, 576 en Uesca y 488 en Teruel. Por sectors d’actividat, as cifras han puyau tamién en o sector servicios (3.391 personas), personas sin anterior treballo (428), construcción (266); pero han descendiu muit licherament en industria (53) y en agricultura (45).

Se i sinyoron 30.519 contractos nuevos, 642 mas que en l’anterior mes, un 2,15% mas. Agora que, 27.896 d’ixos contractos estioron temporals mientres que 2.623 estioron indefinius. O numero d’afiliaus y afiliadas a la Seguridat Social en Aragón se sitúo en 491.438, 5.113 personas menos.

En a resta d’o Estau, a cifra de personas sin treballo puya enta 4.814.435, 113.097 personas mas, un 2,41% mas. As personas afiliadas a la Seguridat Social diminuioron en 184.031 personas, deixando a cifra en 16.173.610 afiliadas, una cifra que nos fa viachar enta l’anyo 2002.

As cifras, manimenos, no cuentan con as personas que son sin treballo y han iu a mirar treballo en o extranchero, as que son realizando cursos ta esqueferaus, as personas que decidioron albandonar os Servicios Publicos d’Emplego por desesperación u por qualsiquier atro motivo u as que treballan sin contracto y sin estar d’alta en a Seguridat Social.

Se veye asinas mesmo en as cifras un aumento en a precariedat d’os contractos (un 16% mas de contractos temporals que l’anterior mes), una cayida en o numero de personas cobrando prestacions (2.742.905 personas, un 2,08% menos que o mes anterior y un 17,4% menos que l’anyo anterior). A quantía d’istas prestacions tamién ye menos, de media bruta 829,80 euros cada mes, 34,50 euros menos que fa un anyo.

Por sexos, se refleixa como l’ature castiga con mayor fuerza a las mullers, con 70.399 mullers mas en as listas d’ature frent a os 42.698 hombres mas en o mes de chinero.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.