30.000 presonas se manifiestan en Tolosa por l’occitano

As luengas minorizatas francesas salion ta la carrera en atros puntos como Bayona, Perpinyán u Ajaccio

O Capitol de Tolosa a rebutir de chent

O Capitol de Tolosa a rebutir de chent

En una chornada festiva 30.000 presonas emplioron as carreras de Tolosa ta reclamar un millor status legal ta l’occitano. Venius de totz os puntos d’Occitania, y tamién d’Aragón, con a presencia d’o Bloque Independentista de Cuchas, Catalunya u mesmo Gales, un rio multicolor alcompanyau de mosicas y esquilos fació un recorriu por o centro d’a capital occitana ta refirmar l’amostranza en occitano y reclamar a coficialidat d’a luenga.

Dende 2009 no se feba ista marcha (en ixa ocasión en Carcasona), y milentas de presonas respondioron a la crida de l’Institut d’Estudis Occitans, Òc-Bi y a Calandreta, baixo lo lema “Anem, Òc” (Imos, Oc). O diya prencipió con una concentración en Plaza Europa an que asociacions de tot o país amostroron os suyos productos y que s’emplegó tamién como punto de trobada de collas d’esfensa de l’occitano de totas as cantonadas d’Oc. Un largo recorriu, en un ambient festivo, marchó dimpués por as carreras de Tolosa enta o Capitol. Astí, collas como Mans de Breish, Primaël, Joan Marc Leclercq, Lou Dàvi, Goulamàs’K, Lo Còr de la Plana, Zinga-zanga e Nadau, fación un concierto de más de 6 horas.

Tamién se demandó mayor autonomia politica ta lo país d'Oc

Tamién se demandó mayor autonomia politica ta lo país d'Oc

O president de Convergencia Occitana (una arroclada de asociacions por a luenga), Joan Francés Laffont, amostró a suya satisfaccion por l’exito d’a chornada, asinas como a voluntat d’os occitans de aconseguir un millor status legal ta la suya luenga. A manifestación d’Anem Òc tamién coincidiba con una chornada en que totas as luengas minorizatas de l’estau francés feban actos de refirme a las suyas culturas vasca, bretona, gala, catalana u corsa.

O diya 31 de marzo, amás, sirvió ta la devantadera de Jornalet, un nuevo meyo dichital de raso en occitan, baixo licencia Creative Commons, a qui, dende Arredol, queremos amostrar o nuestro refirme.

2 Rispuestas a 30.000 presonas se manifiestan en Tolosa por l’occitano

  1. a beyer si per asti bi ha un atra manifestazion ta esfender l´aragones e lo catala d´arago.

  2. No achuntamos aquí 30.000 presonas ta esfender as nuestras luengas ni fartos de vin. Mesmo que bosemos l’entropan.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.