300 escolars d’a provincia de Uesca se quedan en casa por culpa d’a nieu

Dimpués d'un diya de nevadas continadas, l'AEMET mantiene l'alerta en diversas zonas d'a provincia uescana, a on tamién s'han activau avisos por risque important de lurtes

temporalnieuComo gosa d’estar habitual, o temporal de nieu que ha enrestiu (en bellas zonas contina l’alerta) a zona d’os Pirineus uescanos ha trahiu con ell diferents contratiempos t’a circulación u t’o desembolique normal de bellas actividatz. Nomás en a provincia de Uesca, mas de 35 rutas escolars s’han habiu de suspender en as zagueras horas afectando a uns 500 escolars.

Dentro d’ista zaguera provincia, a Chacetania ye a redolada en a que mas s’ha deixau sentir a nieu, con mas de 300 alumnos afectaus seguntes ha notificau a Consellería d’Educación d’o Gubierno d’Aragón. Mientres, en l’Alto Galligo s’han suspendiu 13 rutas y atras tres han circulau de traza parcial. A on menos s’ha deixau sentir, a lo menos en iste aspecto, ye en a Ribagorza a on 26 alumnos no han puesto plegar en as suyas clases por problemas de circulación.

A on s’ha recibiu con os brazos ubiertos a o manto de nieu que ha conqueriu o Pirineu ye en as estacions de nieu, a on manimenos agora han de treballar ta chafar a nieu y poder ubrir antis con antis os centros hibernals que han habiu de zarrar en as zagueras horas. Dimpués de practicament un diya nevando, en Candanchú, Formigal, Cerler y Pandicosa (todas ellas d’Aramón) s’han trobau con mas de 90 centimetros de nieu que agora habrán de ‘controlar’.

Candanchú y Cerler han puesto ubrir mientres a chornada d’o martes, mientres en Formigal y Pandicosa as cosas han estau mas complicadas. En istas dos zagueras, s’ha notificau mas d’un metro de nieu, mientres que en Cerler u Candanchú s’han ‘aconortau’ con entre 40 y 50 centimetros.

Fuent: http://www.aragon2.net/n-20482-2-300_escolares_Huesca_quedan_casa_culpa_nieve

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.