300 presonas triballan en Castanesa ta controlar l’incendio

Un militar ha quedau feriu en volcar l'auto en que triballaba t'apagar o fuego

Incendio en Castanesa

Incendio en Castanesa (Foto: Silvia Garrido)

Iste sabado ha prencipiau una nueva chornada en a que mas de 300 personas son triballando, ya sin aire, ta controlar o fuego declarau en Castanesa. O Gubierno insiste que os vecins desaloixaus no han de prebar a tornar ta os suyos domicilios dica que s’emita l’autorización. Mientres a nueit o fuego a creixiu ta part de Montanui, encara que o viento s’ha aturau.

As seis collas terrestres, as tres autobombas d’o Gubierno y dos seccions d’a Unidat Militar d’Emerchencias que triballoron entre toda a nueit ta seguir abanzando en as labors d’extinción de l’incendio que afecta a os municipios de Las Pauls y Montanui, en a zona de Castanesa, s’han retirau en fer-se de maitins ta estar relevaus por efectivos muito mas amplios.

Os zaguers datos indican que o fuego contina activo y que a lo largo d’a nueit ha creixiu en a zona de Montanui. L’aire ha atura encara que as previsions apuntan a que ferá a suya aparición nuevament a proxima nueit. O tiempo ye poco nuble. No s’ha realizau una nueva estimación y se mantienen as 1.100 hectarias como primer balanz de superficie afectada. Ista superficie abarca fenero, asinas como matorral, pin silvestre u caixico, entre atros.

L’operativo antiincendios d’iste sabado, coordinau por o Gubierno d’Aragón, ye formau por uns 325 efectivos. I hai tres hidroaviones d’o Ministerio, tres collas helitransportadas d’o Gubierno (Alcorisa, Penyalba y Exeya), un helicoptero bombardero Kamov, una brigada d’intervención rapida de Ruente (Cantabria), una brigada d’intervención rapida con siede en Daroca, una coya proveyida con helicoptero procedent de Castellón, dos helicopteros d’a UME (un d’extinción y un segundo de coordinación), seis collas terrestres (Ayerbe, Semontano, Calatayú, Planizar, Os Mallos y Alto Matarranya) y cinco autobombas d’o Gubierno.

O fuego prencipió iste chueves, arredol d’as 17.30 horas d’a tarde, sin que dica o momento se conoixcan las causas d’o mesmo. En istes momentos, siguen desaloixaus os chicotz nuclios de población de Castanesa, Benifons, Ardanui, Noales, Erberá, Neril, Llagunas, Ribera, Ardanué, Senyiú, Fonchanina, Denui, Carots y Xiscarri, perteneixients a os municipios de Montanui y de Las Pauls.

Un militar espanyol d’a UME ha quedau feriu en volcar l’auto en que triballaba en a extinción d’o fuego. Atros companyers suyos que viachaban en o mesmo auto han remaniu ilesos.

A zona de Castanesa ye una zona de gran valura ecolochica que en os zaguers anyos s’ha quiesto urbanizar ta enamplar a estación d’esquí d’Aramón-Cerler, encara que agora o prochecto s’ha aturau.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.