No somos tant saputos

Gonzalo González

Vivimos iste prencipio de sieglo absolutament embelecaus. Dica fa quatro diyas mos creyebanos tant saputos pensando que Europa yera a quintaesencia d’as libertatz y o desembolique, pero de rapiconté resulta que somos a o borde de l’abismo. O nuestro chicot paradiso ha esclatau por os aires mientres mos miramos dentre almiraus y enarcaus. Sin previo aviso, os gubiernos son crebaus por os mercaus y garra institución oficial ni gurú ha estau capable d’advertir-nos d’o que se mos feba dencima. En iste setiembre de 2011 d’espantos y inseguridatz, plega Arredol con a insolencia de sinyalar con o dido os paradigmas que no se podeban questionar y se son contrimostrando catastroficos. Y con vocación de chicota bruixula ta aduyar a imachinar chicotz plans que mos premitan replecar ista realidat complexa y cambeant.

En plena reinvención d’os meyos de comunicación tradicionals, qui mos conectamos a traviés d’ista pantalla de Arredol bebemos d’os retz socials y o networking en una desperiencia ciudadana y no lucrativa. Ista libertat ferá que Arredol se fixe en afers que quedan difuera d’o foco y por intreses, dixan d’esistir ta os ciudadans. Fer-lo en aragonés contina estando l’exercicio d’una libertat encara viedada por os intolerants d’o pensamiento unico, y amás, una forma esferenciada de fer esprision d’a nuestra pluralidat. Somos ficaus de raso en un cambeo de ciclo politico con retalladas de dreitos y libertatz, nomás dende lo colectivo y l’analís podremos concarar-lo. Bienplegaus a qui debate, a qui piensa y fa, a qui no rebla y qui s’aima ista tierra. Bienplegau, Arredol.

Gonzalo González

2 Rispuestas a No somos tant saputos

  1. Antonio Serón Gascón

    A ideya que es abí ye prou güena, a mirar si a tele aragonesa y os meyos aragoneses fan o mesmo y beyemos a l’aragonés en os papels. Sólo que una demanda. Por qué emplegaz ista grafía que no ye aprebada y no a que sí ye aprebada en os dos Congresos ta la normalización de l’Aragonés. Por curiosidá

    Muitas grazias y t’adebán

    • Hola Antonio. Muitas gracias por os animos! O tema d’a grafía naxe d’a decisión d’o nucleo d’o prochecto. As presonas que integramos arredol mos sentimos comodos con ista que naxe d’o mandato d’o II Congreso y que desembolicó l’E.F.A. En tot caso, asperamos que ixo no siga un problema ta la chent que fa servir atras grafías. Un saludo! 🙂

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.