40.000 zapatistas fan una marcha silenciosa por ciudatz d’o sur mexicano

Ye a movilización más important dende o suyo devantamiento en 1994

Una d'as marchas (Foto: Aporrea.org)

Una d’as marchas (Foto: Aporrea.org)

Vestius con os suyos sinyalers pasamontanyas y paliacates, más de 40.000 zapatistas facioron ahiere una marcha silenciosa a on que han ocuporon as plazas de cinco ciudatz d’o sur mexicano:  Ocosingo, Sant Cristobal d’as Casas, Palenque, Altamirano y Las Margaritas.  Ye estada a movilización más numerosa dende o devantamiento armau d’o Exercito Zapatista de Liberación Nacional (EZLN) o 1 de chinero de 1994.

Os zapatistas son plegaus dende as suyas comunidatz en rebeldía t’a Universidat d’a Selva, amán de Toniná y, dende astí marchoron t’o parque central de Ocosingo a on que s’estioron tres horas debant d’o concello, puesto que prenioron quan declaroron a guerra t’o gubierno mexicano. Con os punyos enta alto facioron un desfile ta rematar tornando ent’a selva. Ixe mesmo acto se repitió de traza parellana en as atras quatre ciudatz.

En Sant Cristobal d’as casas, estioron recibius con aplausos y chilos de “¡Entalto Marcos!” – un d’os liders d’a insurrección- y “¡Entalto os zapatistas!. Ya en istas semanas d’antis s’especulaba con que l’EZLN podese planeyar bella actuación ta ista calendata, encara que no se pensaba que podese estar d’as proporcions que ye estada. O diya coincidiba con una suposada predicción maya d’a fin d’o mundo. Os zapatistas han quiesto contrimostrar a rasmia que encara tienen dimpués de quasi dos decadas devantaus.

En un breu comunicau feito por a Comandancia Cheneral d’o EZLN, y sinyau por o Subcomandant Insurchent Marcos, os zapatistas han dito:  “¿Ascuitoron? Ye o soniu d’o suyo mundo esvoldregando-se. Ye o d’o nuestro revilcando. O diya que estió o diya, yera nueit. Y nueit será o diya que será o diya. ¡Democracia! ¡Libertat! ¡Chusticia!”

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.