400 personas se concentran demandando a libertat de “Alfon”

400 personas estioron en a concentración convocada por a plataforma "Stop Represión" demandando a libertat d'iste choven vallecano, deteniu dende a vada d'o 14N

Alfon libertatArredol de 400 personas se concentroron ahiere en a Pza. d’Espanya de Zaragoza demandando a libertat d’Alfonso Martínez (“Alfon”), a unica persona encara detenida en toda Europa en relación a la chornada de vada cheneral d’o pasau 14 de noviembre. O viernes ya se facioron concentracions y manifestacions en una trentena de ciudatz arredol de tot l’Estau. A concentración estió convocada por a plataforma “Stop Represión”.

O choven estió deteniu en a pasada vada cheneral en Vallecas chunto a la suya novia mientres iban ta un piquete informativo. Tanto a suya familia, como a chent que s’ha solidarizau, como a suya esfensa denuncian que Alfon ye victima d’un montache policial y chudicial. Ye acusau, chunto a la suya novia, de tenencia d’explosivos, por o que pueden estar condenaus a penas de garchola d’entre 4 y 8 anyos. Denuncian que no existen prebas que confirmen istos feitos y que se tracta d’un caso de criminalización. Mientres a suya novia estió mesa en libertat, Alfon quedó en prisión preventiva a tamás de que mesmo o fiscal admite que no existe risque de fuga, debiu a posible “alarma social”, una figura churidica que no existe en o Codigo Penal espanyol. O chueves, a chueza instructora d’o caso refusó o recurso d’a esfensa que demandaba a libertat d’o choven. A esfensa y familiars temen que Alfon remate cumplido a pena de garchola en aspera de que se celebre o chuicio. Alfon ye en rechimen FIES (Fichers d’Internos d’Especial Seguimiento), o mas duro d’os rechimens de garchola.

Mientres a concentración s’han chilau consignas demandando a libertat d’Alfon, asinas como contra a represión y contra as prisions, y en rematar s’ha leyiu o comunicau en o que se demanda a libertat decamín d’o choven vallecano, asinas como a fin d’o montache policial y a criminalización que denuncian que existen.

En a concentración i heba representants politicos d’IU en Aragón, asinas como o diputau en o Congreso espanyol Chesús Yuste, de CHA, amás de miembros d’os esferents colectivos d’o Bloque Independentista de Cuchas, d’os sindicatos CNT, CGT, SOA y miembros d’esferents movimientos socials de diversa mena.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.