4,3 millons de personas, record d’inscriptos, votará en o referendum d’Escocia

Con una población de 5,2 millons, 4,3 millons de personas votará o venient chueves pa decidir sobre a independencia d'Escocia d'o Reino Uniu

Manifestación en Buchanan Street en Glasgow a favor d'o ‘sí’ a la independencia d'Escocia. Foto: @YesScotland

Manifestación en Buchanan Street en Glasgow a favor d’o ‘sí’ a la independencia d’Escocia. Foto: @YesScotland

Quasi 4,3 millons de personas s’ha inscripto pa votar en o referendum d’independencia escocés, “o mayor electorau nunca rechistrau en Escocia pa una elección u un referendo”, seguntes a Oficina Electoral.

En un comunicau, l’organismo, que s’ocupará d’o recuento en a nueit y a maitinada d’o 18 a o 19 de setiembre, precisa que o total de personas rechistradas asciende a 4.285.323, d’os que 789.024 ha votau ya por correo.

Tienen dreito a votar en ista consulta, que se celebra o 18 de setiembre, os residents en Escocia mayors de 16 anyos, incluius ciudadanos d’a Unión Europea, d’a Commonwealth y os miembros expatriaus d’as Fuerzas Armadas.

A Oficina Electoral no ha precisau quántos adolescents de 16 y 17 anyos s’han rechistrau pa votar en ista ocasión.

Escocia tien una población de 5,2 millons y Glasgow ye a ciudat mas habitada con 592.820 habitants, seguntes os datos oficials de 2011. Le siguen Edimburgo, con 486.120; Aberdeen, con 217.120; Dundee, con 144.290 habitants; Stirling, con 89.850, y Inverness, con 56.660.

O 18 de setiembre, os 2.608 colechios electorals existents en Escocia serán ubiertos dende as 6.00 GMT (8.00 en Aragón) dica as 21.00 GMT (23.00 en Aragón), y o recuento empecipiará chusto dimpués d’o zarre d’as urnias.

Cadaguna d’as 32 autoridatz locals d’Escocia efectuará o suyo propio recuento, que remitirán dimpués a la Oficina Electoral, que aspera tener un resultau significativo a primer hora d’o maitín d’o viernes 19 de setiembre.

En a consulta, as y os electors habrán de responder con una cruz en a correspondient caixeta d’o “sí” u d’o “no” a la pregunta: “Habría Escocia d’estar un país independient?”.

“A zaguera estratechia unionista no enganya a dengún

O ministro prencipal escocés, Alex Salmond, compareixió o pasau chueves frent a la prensa internacional en l’auditorio Pentland d’Edimburgo pa asegurar, en unas declaracions replegadas por Naiz, que a zaguera estratechia unionista “no enganya a dengún” y que os escoceses “son decidius a votar por a independencia”.

Manimenos a visita de David Cameron ta Escocia y a caracterización que a campanya independentista ha teniu en a persona de Salmond, o ministro prencipal escocés ha escapau d’una batalla entre totz dos: “Ni yo soi a persona que va a ganar una Escocia, ni Cameron a persona que la va a perder. No ye una campanya entre nusatros y, amás, Escocia no ye garra propiedat de Londres” apuntó.

D’a mesma traza, recordó que a ofierta de devolución de poders no ye una estratechia nueva de l’unionismo: “En o referendum de 1979 ya nos lo prometioron, y dimpués Thatcher fació precisament lo contrario”, argumentó. Debant de mas de 70 medios de tot o mundo, Salmond sinyaló que o referendum d’o proximo chueves “ye o encomienzo pa una nueva Escocia, pero tamién pa un nuevo mundo”, como efecto d’a repercusión que puede tener en diferents puntos d’o mundo.

En iste sentiu, preguntau por o empentón que puede dar a procesos como os de Catalunya u Euskal Herria, ha quiesto diferenciar os casos: “I hai millons de personas hue en as carreras de Catalunya reclamando o suyo dreito a decidir, ye una cosa de tot acceptada aquí”, ha apuntau. Agora que, no querió entrar a valurar a posición d’o Gubierno espanyol. “No soi dengún pa opinar sobre os suyos afers, solament puedo dicir que aquí imos a decidir en absoluta democracia”, afirmó.

En l’anyo 2014 garra pueblo habría d’estar gubernau por unatro

En una recient entrevista, publicada por Gara, Franny McArdle, portavoz de Cairde na hÉireann (Amigos d’Escocia, en gaelico), branca escocesa d’o Sinn Fein dende fa mas de seis anyos y taxista de profesión pa alimentar a os suyos siet fillos, explica os problemas especificos d’a suya comunidat y veye a independencia d’Escocia como “un trango primero, pero gran, pa resolver-lo, pa vivir millor”.

Una victoria d’o ‘sí’ necesariament tendría efecto sobre Irlanda, me pienso que mas chent se i sumaría. No cambiaría os motivos pa la unidat d’Irlanda, pero sí daría animo y refuerzo positivo”, adhibe McArdle pa afirmar que “en l’anyo 2014 garra pueblo habría d’estar gubernau por unatro”.

Pase o que pase o día 18, a luita contina

Por a suya parte, Colin Fox, naixiu de Motherwell (Escocia) fa 55 anyos, cofundador d’o Partiu Socialista Escocés (SSP) y o lider politico mas lonchevo d’Escocia asegura, en unatra entrevista espardida por o diario vasco, que “pase o que pase o día 18 (calendata d’o referendum), a luita contina”.

Fox, marcau por o Thatcherismo y por o referéndum d’autonomía de 1997, fa un poder agora por levar o debat t’as carreras d’Edimburgo, a on atiende a Gara. Dende 1995, Colin Fox s’ha instalau en a capital escocesa, an que estió miembro d’o Parlamento entre 2003 y 2007. En ista campanya, preba de sumar nuevas caras a la politica y por ixo ha centrau a suya labor en popularizar o referendum. Considera, de feito, que a convocatoria ya ha teniu o efecto de multiplicar a consciencia politica en Escocia.

Fuent: http://arainfo.org/2014/09/43-millones-de-personas-record-de-inscritos-votaran-en-el-referendum-de-escocia/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.