51 escuelas han ubierto iste Nadal

Bells 1.600 ninos han acudiu a la escuela istas fiestas

A consellera Dolores Serrat con os ninos d'o CEIP Tío Jorge de Zaragoza. (Foto: comarcas.es)

Tallers, cursas y muitas actividatz tanto en as aulas, como a l’aire libre. Son bellas d’as proposas que ufre o programa “Ubierto por vacanzas” ta que istos diyas no lectivos deixen d’estar un problema ta os pais y familiars. En total, bells 1.600 ninos aragoneses disfrutan d’ista iniciativa en a que participan 51 centros de tot Aragón.

 

A consellera d’Educación, Universidat, Cultura y Esporte, Dolores Serrat, visitó ahiere de maitins o CEIP Tío Jorge de Zaragoza, an que 35 ninos disfrutan d’iste programa. Serrat calificó ista iniciativa como “útil y muit intresant”, ya que “fa honra ta la conciliación d’a vida laboral y familiar”. A más, adhibió, ye “educativo y pedagochico, y os mesaches son entretenius y aprendendo cosas”. Iste programa tamién ufre a posibilidat de que os ninos chenten en o colechio, o que permite que se cumpla a doble función d’ista iniciativa.

 

En total, son 51 os centros aragoneses que ubren mientras istas calendatas, dica o venient 8 de chinero. D’ellos, 27 son en Zaragoza, 17 en Uesca y 7 en Teruel. Encara que en primeras s’aprebó lo prochecto de 75 centros, a la fin nomás han ubierto que 51 por o numero de matriclas ya que s’amenista un minimo de 15 alumnos en a zona rural y de 35 en a ciudat ta desenvolicar o programa.

 

En o caso de Zaragoza capital, os Centros d’Infantil y Primaria que cuentan con l’actividat reciben ninos d’atras escuelas que no han ubierto. Totz os centros, ha explanicau Serrat, reyalizan asaber-las actividatz, encara que a programación “pende d’a dirección y s’organiza a traviés d’un mayestro coordinador, l’asociación de pais u atra interpresa”.

 

Por a suya parti, o director d’o colechio Tío Jorge, Lorenzo Oro, aseguró que os ninos se lo pasan bien y “deseyan venir t’o colechio porque fan muitas actividatz y son contentos”. Asinas, o colechio Tío Jorge, reyaliza un programa ta 35 alumnos d’entre cinco y dotze anyos. Se tracta d’actividatz relacionadas con l’esporte, chuegos sociomotrices y populars, tallers de destrezas acrobaticas de circo u tallers de manualidatz, d’entre atras. Un d’os obchectivos, sinyaló Oro, “ye que aprendesen que venir t’a escuela no ye un castigo, que se pasen bien y faigan cursas”. Os ninos, aseguró “veyen a esferencia”. O colechio ye ubierto de 08.00 a 15.15. D’os 35 mesaches que acuden a o CEIP Tío Jorge, bells vente chentan en casa suya. “Os que vienen dica las 13.30 horas bosan 30 euros por os ueito diyas y a resta, os que i chentan, bosan 70 euros”, comentó lo director d’o Centro.

Fuent: http://www.comarcas.es/index.php/mod.noticias/mem.detalle/idnoticia.6591/relcategoria./chk.603119fb7f213360ae6ae54faf70d429.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.