52 peliculas en a XIII Muestra de Cine Realizau por Mullers en Uesca

Dica o diya 17 de marzo, 52 peliculas feitas por mullers serán exhibidas en a muestra en a capital altoaragonesa

cartel XIIIAhiere s’engueró ista muestra en o salón d’actos d’a Diputación Provincial de Uesca. A muestra ye presta por o Colectivo de Mujeres Feministas de Uesca y o Grupo de Mujeres de Sobrarbe, y consta de 52 peliculas de diferents nacionalidatz, entre ellas aragonesas, amás d’a resta de l’Estau espanyol, y Francia, Mejico, Marruecos, Estaus Unius, Liban, Suecia, Noruega, Reino Uniu y Alemanya. As peliculas, curtometraches, documentals y largometraches, de diversa tematica, tamién s’han puesto viyer, en parte, a semana pasada en Boltanya y Lalueza.

A muestra se desembolicará dica o diya 17 de marzo tanto en o teatro Olimpia como en o salón d’actos d’a Diputación Provincial de Uesca y o salón azul d’o Círculo Oscense, contando con servicio de guardería en a ludoteca Cascabillo. A entrada en as sesions ye libre, fueras d’as sesions de nueitz, con entradas a 2 € u bono especial ta todas as sesions de 8 €.

Entre as realizadoras aragonesas que ahiere i presentoron as suyas obras, se cuenta con a presencia d’os filmes de Marta Javierre (“Lugares vividos”), Tana Garrido (“Brassica Olaracea var. Viridis”), Lola Gracia (con a cinta en aragonés baixorribagorzano “Cosetas d’adentro”), Pilar Palomero (“Chan chan”), Lorena Hernández (“Vamos bonita”) y o grupo Genciana (con o documental “Científicas que dejan huella”).

A destacar a presencia tamién de peliculas como “Los niños salvajes”, de Patricia Ferreira, nominada a os premios Goya; “Pourquoi?” d’Isabel Caparrós, u “El plat o la vida” de Nani Moré.

Se cuenta tamién con actos paralelos a la muestra, como a exposición “Estrellas del Cine Mudo“, en o teatro Olimpia, unatra exposición, ista d’os cartels d’as muestras, en a dentrada de l’Hespital San Jorge, y “Paisajes de salón“, exposición de pinturas d’a pintora Martínez Carnicer en a librería Anónima.

Una rispuesta a 52 peliculas en a XIII Muestra de Cine Realizau por Mullers en Uesca

  1. Pingback: 52 peliculas en a XIII Muestra de Cine Realizau por Mullers en Uesca | AraInfo | Achencia de Noticias d´Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.