57 detenius por compartir y poseyer pornografía infantil

Un d'os detenius ye de Zaragoza. - Entre os detenius i hai quantos casos de reincidencia.

Vehiclo d'a policía adscrita a Aragón (Foto: Biquipedia)

Achents d’a Policía Nacional han deteniu a 57 personas que compartiban u poseyeban material pornografico infantil a traviés d’Internet. Ista investigación ha estau posible gracias a l’emplego d’un software puntero a ran internacional: o programa GnuWatch que permite detectar a os usuarios que son compartindo fichers de conteniu pedofilo con una excelent precisión. A operación, denominada KOBEN, s’ha desembolicau en 21 provincias de l’estau en as quals s’han efectuau diversos rechistros, s’han interveniu mas de 240 discos duros y s’han imputau a atras 24 personas delitos relacionaus con a posesión u distribución d’iste tipo de material.

Os detenius compartiban y poseyeban fichers pornograficos en os quals intervienen ninos de curta edat fendo actos de naturaleza sexual con adultos. Entre a semana de monitorización feita por os ciberachents, s’ha comprobau que cadagún d’os usuarios investigaus s’habría descargau una meya de cinco fichers en ixe breu espacio de tiempo. Amás, belún d’ells heba plegau a poseyer mas de 800.

Os achents han destacau l’elevau ran de qualificación de muitos d’os arrestaus, con altas conoixencias d’informatica -por os suyos estudeos u profesións- y que han dificultau a suya identificación. S’ha detectau una puyada en l’emplego de programas d’uso profesional de borrau seguro de datos con a intención d’eliminar os sinyals que podesen deixar en o sistema. Con tot y con ixo, han estau localizaus y detenius.

Un d’os arrestaus teneba instalau un sistema amplificador d’o sinyal wifi en a terraza d’o suyo domicilio. Iste dispositivo ye emplegau ta enamplar a capacidat de captar connexions inalambricas que emiten atros dispositivos achenos, ta fer servir fraudulentament ixas linias y enmascarar a connexión de l’usuario real.

Destaca tamién l’alto numero de detenius reincidents, ye dicir, suchetos arrestaus anteriorment en operacions vinculadas a la distribución y tenencia de pornografía infantil.

O material interveniu en os rechistros efectuaus en 21 provincias espanyolas contiene fichers de videos d’extrema dureza, como agresions sexuals a menors de muit corta edat. Os investigadors son examinando minuciosament totz os fichers en busca de qualsiquier dato que permita identificar a os agresors, a os ninos victimas d’os abusos u determinar si belún d’os implicaus ye autor u productor d’os videos y agresions.

A operación ha estau dirichida por a Brigada d’Investigación Tecnolochica d’a UDEF Central d’a Comisaría Cheneral de Policía Chudicial, y en ella han participau tamién os grupos especializaus d’a Chefatura Superior de Policía de Madrit y d’as Comisarías Provincials de A Corunya, Malaga, Murcia, Barcelona, Tarragona, Soria, Leyón, Cordoba, Uelva, Sevilla, Almería, Alicant, Valencia, Castellón, Cantabria, Uesca, Zaragoza, Vitoria, San Sebastián y Las Palmas. Asinas como as comisarías locals de Santa Coloma de Gramanet, Sanlucar la Mayor, Novelda, Elch, Alcoy, Gandía y Lerín.

Una rispuesta a 57 detenius por compartir y poseyer pornografía infantil

  1. Un d’es detenius ye Noel Patrick Hughes, dica ahiere (15 de febrero) chefe d’o gabinet d’a Consellería d’Agricultura y Meyo Ambient d’o Gubierno d’Aragón. Ha siu cesau de traza fulminant y sustituiu por Alberto García.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.