62 ninos se quedan sin plaza en Roseras d’a Canal por decisión d’a Consellería

Educación ubre dos nuevas aulas en l'Espatidero y Miralbueno II y en zarra atras ueito

Protesta contra a chestión d'o proceso d'escolarización (Foto: Plataforma Andando al cole)

Protesta contra a chestión d’o proceso d’escolarización (Foto: Plataforma Andando al cole)

O proceso d’escolarización continó iste chueves con polemica por a falta de plazas en os colechios d’os vicos d’os sur de Zaragoza, más que más, de Roseras d’a Canal. Dende a Consellería d’Educación no s’ascuitoron as demandas de asociacions de mais y pais y de representants d’a comunidat educativa que demandaban que se ubrisen nuevas aulas en as escuelas de Val d’Espartera, Montecanal y Roseras d’a Canal.

Dimpués d’ista decisión, 62 ninos d’o vico de Roseras d’a canal s’han quedau sin plaza, habendo-ie 137 demandas ta 75 plazas que se ufrioron. Casos parellanos bi’n ha habiu en Montecanal, con 108 demandas ta 75 plazas u Val d’Espartera con 104 demandas ta 100. Os ninos habrán d’escolarizar-se en atras escuelas difuera d’o vico, en bells casos mesmo a distancias de kilometros. Dende fa bellas semanas ya ye funcionando una plataforma d’afectaus por istas decisions d’a Consellería menada por Dolores Serrat, qui han criticau furament ista politica d’escolarización. Iste chueves, dimpués de conoixer a decisión d’Educación, demandoron a dimisión por a suya ineptitut y manca de voluntat d’a directora provincial, Montserrat Martínez, d’o director cheneral d’Ordenación Academica, Marco Rando y d’a propia consellera d’Educación, Dolores Serrat.

 

Cuanto a lo resto d’a ciudat, a Consellería decidió d’ubrir dos nuevas aulas en as escuelas de El Espatirero y Miralbueno II a on que tamién más de 60 ninos s’heban quedau sin plaza. D’atra man ha decidiu de zarrar-ne atras ueito en os colechios Andrés Oliván, Gustavo Adolfo Bécquer (Garrapinillos), Jerónimo Blancas, Ricardo Mur (Casetas), Ramón Sáinz de Varanda, Calixto Ariño, Marcos Frechín y Santo Domingo de Silos.

O proceso d’escolarización ye estando polemico tamién por a concertación d’o colechio catolico Virgen de Guadalupe, lo que dende a oposición y bells sectors socials se viye como parti d’a politica privatizadera d’a educación levada por a Consellería. O sindicato CGT, en ixa linia, denuncia que se concierten dos vías en o colechio Sagrada Familia con nomás 22 alumnos u con La Anunciata que tamién en tendrá dos ta 27 ninos, entre que quedan plazas libres en os colechios publicos d’a redolada.

A ratio -o numer d’alumnos en clase por cada mayestro – continará estando de 25, lo que dende FAPAR y os sindicatos d’amostranza ye estau tamién criticau en considerar-se “excesivo y un atentau t’a calidat d’a educación”.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.