879 aturaus más en Aragón

Contina por dencima de 100.00 o numer d'aturaus en Aragón

inaemAgosto contina estando un mes malo t’o treballo y confirmando a puyada en o numer d’aturaus d’o mes pasau, quan se blincoron as 100.000 personas sin treballo. En total, bi ha 879 aturaus más y o numer total ye de 103.032. Un 0,86% más que o mes pasau.

En terminos interanyals, as cifras son millors, con 7.461 aturaus menos que en o mesmo mes de 2013. Por territorios, as tres provincias rechitran puyadas. 290 aturaus más en Uesca (+390), 76 en Teruel (+0,80) y 414 en Zaragoza (+0,52%). Por cheneros, os dos puyan tamién, estando un poquet más gran o porcentache en os varons (0,97% frent a 0,76%). Un d’os pocos datos positivos se troba entre os más chovens, por un regular vinclaus a treballos de poca duración y prou precarios, pero que han reduciu o suyo ature en 72 personas. Por sectors economicos, Agricultura y Construcción son os unicos en salvar-se, entre que o sector servicios ye o que más ature concentró por a fin d’os achustes de verano.

Bells partius, como Izquierda Unida, ya han feito publico lo suyo analís d’os datos, calificando de “fracaso” as politicas de treballo d’o gubierno PP-PAR. Ta Adolfo Barrena, portavoz d’a formación, ye “inacceptable” que o Gubierno d’Aragón “empente politicas de retalladas que fan destruyir treballos”. Tamién han recordau que “d’os 103.032 aragoneses en l’ature, nomás 55.574 reciben prestación, asinas que en istos momentos bi ha 47.200 personas victimas d’a reforma laboral que no tienen garra euro d’os recursos publicos.

Dende OSTA denuncian antimás que os nuevos achustes se son fendo “en condicions precarias y con infra-achustes: temporals (tasament un 6% d’os nuevos achustes son indefinius), chornadas a tiempo parcial y chornals bien amanaus  a lo minimo interprofecional”. “Entre que tot isto pasa” – adhiben dende o sendicato- “o Gubierno d’Aragón contina amostrando-se incapable de fer propuestas y alternativas que cheneren treballo, ni a curto, ni a meyo, ni a largo plazo. Aragón camina enta una situación socialment insostebible sino se prenen decisions a escape endrezadas t’o creiximiento productivo”.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.