94 immigrants mueren en incendiar-se a suya barcaza amán d’Italia

A lo menos 150 d'ells han estau rescataus y continan desapareixidas amán de 300 personas

Plegada d'immigrants en Lampedusa. Foto: Micniosi

Plegada d’immigrants en Lampedusa. Foto: Micniosi

A lo menos 94 personas ha muerto dimpués d’o naufrachio d’a barcaza en que viachaban amán de 500 immigrants eritreus y somalíes que prebaba de plegar en a isla italiana de Lampedusa, t’o sud de Sicilia, seguntes informoron hue fuents d’os equipos de rescate. “O mar ye pleno de cuerpos. Ye una horror”, ha lamentau l’alcaldesa d’a isla, Nicolini Giusi.

Ya s’ha recuperau mas de 90 calavres, entre ells dos ninos de pocos anyos y una muller prenyada, pero a cifra de muertos puede estar mayor. O barco s’ha fundiu muit amán d’a costa d’a isla dimpués de declarar-se un incendio. Seguntes l’alcaldesa de Lampedusa, Giusi Nicolini, os supervivients “han explicau que enchegoron un fuego a bordo porque no teneban cobertura y os mobils no funcionaban“, informa Europa Press.

O diario dichital local Giornale de Sicilia ha difundiu un vidio an que puede observar-se a gravedat d’a trachedia. As imachens amuestran a plegada d’una parte d’as personas rescatadas, entre que o personal de salvamento maritimo treslada a un puerto d’a isla os cuerpos d’os fallecius localizaus.

“Han rematau totz en l’augua y pareixe estar que bells pesquers ha pasau y ha continuau o suyo camín sin aduyar-les“, ha adhibiu l’alcaldesa, subrayando que “si isto ye cierto, caldrá aclarir-lo“. Asinas mesmo, en declaracions a Rainews 24, ha manifestau o suyo penar y a suya impotencia por ista “trachedia terrible”.

O comisario extraordinario de l’Achencia Sanitaria de Palermo, Antonio Candela, que coordina as operacions d’asistencia a os immigrants rescataus, explicó a Efe que ya son en tierra firme 150 personas, entre ellas 30 ninos, belún de pocos meses, y dos mullers prenyadas.

En a operación de rescate intervienen con bella lancha a Guardia Costera italiana y a Policía de Finanza y Mugas italiana (Guardia di Finanza).

Mientres a nueit heba arribau a la isla una barcaza con 463 immigrants a bordo, que estioron tresladaus t’o centro d’acullida de Lampedusa, que prencipia a desbordar-se ya que ahiere yera en o maximo d’a suya capacidat, 700 personas.

Se tracta d’una nueva trachedia d’a immigración en as zagueras semanas, dimpués que tretze personas fallecioron o pasau 30 de setiembre dimpués d’haber estau obligaus por os traficants a blincar d’a barcaza en a que viachaban pese a que no sabeban nadar y i heba un fuerte oleache.

O grupo de 200 personas estió obligau a tirar-se t’o mar a pocos metros d’a placha d’o “Pisciotto” d’a localidat de Scicli, en a provincia de Ragusa, Sicilia.

O pasau 10 d’agosto, atros seis immigrants, entre ells un menor d’edat, fallecioron en fer un poder por alcanzar a nado a costa de Sicilia dimpués d’haber encallau o pesquero en que viachaban chunto a un centenar de personas procedents de Siria y Echipto.

Fuent: http://www.eldiario.es/desalambre/inmigrantes-mueren-llegar-italiana-Lampedusa_0_181981922.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.