A “Carpa d’o Ternasco” ubre iste viernes

Prencipia o programa d'actos que durará dica la fin d'o Pilar

Un d’os espacios que ye tenendo cada vegada mas chent mientres as Fiestas d’o Pilar ye a “Carpa d’o Ternasco. Ista anyada a carpa fa o suyo cinqueno cabo d’anyo y s0ubrirá una semana antis que de cutio ta celebrar os “prepilars” ta ir fendo boca. Igual como en atras edicions, iste evento preba de mezclar gastronomía y actividatz 100 % aragonesas.

A “Carpa d’o Ternasco”, punto de trobada t’a gastronomía aragonesa, se adebanta una semana estianyo y ubrirá as puertas usyas o venient diya 30. Os actos continarán dica o 16 d’octobre, en o suyo puesto de cutio, a carrera Moret. Ista fita con o ternasco d’Aragón ye un d’os “puntos fuertes de l’actividat en as Fiestas d’o Pilar”, ha afirmau o conseller de Cultura d’o Concello, Jerónimo Blasco.

Ta ir fendo boca y como plato fuerte, o viernes a carpa prencipiará a las 22.00 con China Chana. Encara que no será dica o sabado que se prencipien a fer as actividatz de meyodiyas. Ixa mesma tardi pasarán por o scenario dos homenaches a dos collas de rock. “Gran Bob” con o tributo a “Rosando” y “El silencio de los héroes” con o suyo homenache a “Héroes del Silencia”. Y ya será o domingo quan “O festival d’a humor” prencipie con un concurso popular de chistes y lo ya tradicionals “Monologos por a beneficiencia”.

Ista anyada bi habrá más de 90 actividatz de baldes, que se combinarán con productos de denominación d’orichen d’a tierra, entre ells, o convidau estrela, o ternasco d’Aragón. L’evento fa a suya cinquena anyada y “s’ha consolidau como referent d’as fiestas porque ye a plaza d’os lugars aragoneses”, ha explicau o responsable de comunicación d’o Grupo Pastores, Diego Franco. Antimás “amilloramos sobre l’anyada pasada”, ha guaranciau.
Antimás de prencipiar una semana antis, a Carpa traye atras novedatz ta istos Pilars. A celebración d’un taller de cocina aragonesa y o concurso popular de tapas de ternasco d’Aragón son as dos apuestas gastronomicas ta ista edición. O taller de cocina se ferá mientres todas as fiestas dende o sabado 9 a partir d’as 12.15. O cociner Raúl Pobo será l’encargau de parar dos tapas con un producto de Denominación d’Orichen: Longaniza de Graus u quesos d’Albarrazín, entre atros.

As actividatz se ferán arredol d’os seis grans momentos gastronomicos d’o diya. En cadagún d’ixos momentos se podrán tastar diferents trazas de minchar ternasco. De maitins, a carpa será destinada a la programación y tallers t’a catrinalla. Mientres o socalce se ferá o taller de cocina y se parará un plato de cullara alazetau en o ternasco. Atra d’as novedatz d’estianyo será en a sobremesa, momento que se ferán concursos de guinyote, auca, mus u morra.

De nueitz, como todas as anyadas, bi habrá humor, conciertos, concursos y orquestas. “Apostamos por as collas aragonesas 100 por 100 porque son grans referents que atrayen a la chent de diferents estilos”, ha explicau Franco.

A colla organizadera preba ista anyada de blincar os 35.000 entropans vendius. Antimás estianyo han apostau por “salir d’o tipico ternasco rustiu y amostrar atras opcions”, ha dito Franco. Una d’ixas alternativas ye a de distribuyir “cucuruchos de pizquetas de ternasco ta que a chent se’n gronxie entre que vei as actuacions”.

L’adchudicación de l’evento s’ha reyalizau via concurso ta “escusar-nos toda mena de creticas y asinas se continará fendo siempre que bi haiga una actividat comercial”, ha afirmau Jerónimo Blasco. T’acceder a lo concurso caleba fer una alportación de 60.500 euros.

Fuent: http://www.aragon2.com/n-13014-3-Carpa_Ternasco_abre_este_viernes

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.