A 6ª Bicicletada Escolar recorre as carreras zaragozanas

O Colectivo Pedalea organizó unatra vegada a ya tradicional Bicicletada Escolar, que ha recorriu as carreras zaragozanas rematando con multiplas actividatz en o Parque Bruil.

O Colectivo Pedalea ha organizau unatro anyo mas a Bicicletada Escolar en Zaragoza, en a suya seisena edición. A tamás d’o fresco y fosco diya que s’ha devantau, 200 personas entre ninos y ninas de todas as edatz, pais, mais y profesors y profesoras de colechios y institutos han participau en ista nueva edición d’a bicicletada con l’animo de fer vistero l’emplego d’a bicicleta en a comunidat escolar, asinas como reivindicar formación vial ciclista en os colechios y reclamar midas de fomento d’a circulación por a calzada que faigan l’emplego d’a bici mas seguro.

A quedada ha estau a las 10 h. en a Pza. d’o Pilar a on s’han repartiu pegallos infantils y globos ta decorar as bicis. A marcha ha transcurriu tranquila y en un ambient festivo, mesmo acompanyada con mosica. S’han recorriu carreras como o Coso, Paseu Constitución, Paseu Pamplona u Paseu Echegaray y Caballero, ta plegar arredol d’una hora dimpués en o Parque Bruil, a on s’han desembolicau una serie d’actividatz pensadas alazetalment t’os mas chicotz, con una gymkhana, bicicletas adaptadas, tandem, taller d’autorreparación, un taller sobre a fisica en a bicicleta y unatro de pintura, que han continuau mientres dos horas mas.

A Bicicletada Escolar tornará a recorrer as carreras zaragozanas en a setena edición, y en ista ocasión no caldrá asperar dica mayo, ya que s’organizará en setiembre en o prencipio d’o curso escolar. Ista actividat ye enmarcada en o plan global “Con bici al cole“.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.