A bandera d’o Reino Uniu esdeviene en signo de discordia violenta en Irlanda d’o Norte

As protestas van contra a decisión d'o Concello de Belfast de no fer ondeyar a bandera britanica que 17 días a l'anyo

Belfast_City_Hall_2007

Concello de Belfast. Foto: Wknight94, Wikipedia

De nuevas, en a tarde d’o 6 de chinero, se producioron incidents graus en Belfast, capital d’Irlanda d’o Norte: prochectils, tochos y botellas lanzaus por una colla d’unionistas u leyalistas volaban por as carreras contra a policía que s’esforzaba en mantener l’orden. Iste rebrote d’a violencia yera a respuesta a la represa de discusions entre representants politicos y relichiosos ta meter fin a una nueva manifestación de refuse d’os alcuerdos de Viernes Santo de 1998, entre os partidarios de mantener Irlanda d’o Norte dentro d’o Reino Uniu y qui quieren deseparar-se-ne y integrar-se en a Republica d’Irlanda.

Ista vegada o refuse s’heba focalizau en un feito aparentment d’una importancia relativa: a decisión, presa o 3 d’aviento de 2012, por os 29 rechidors republicanos -contra a opinión d’os 21 rechidors unionistas- d’o Concello de Belfast d’amugar a exposición publica d’a bandera britanica a decisiet días a l’anyo, y en conformidat con a normativa existent aplicada en totz os edificios oficials d’Irlanda d’o Norte. Evidentment que ista decisión teneba tamién una intencionalidat politica, ya que a bandera d’o Reino Uniu ondeyaba, dica a mencionada calendata, en a frontera d’o Concello totz os días de l’anyo, dende 1906. Con tot y con ixo, a reacción d’os unionistas iba dillá d’una protesta civica, yera una purna que feba esclatar de nuevas a rotunda no acceptación d’o proceso de reconciliación entre viellos enemigos.

Os eslogans que se sienten mas, en as repetidas manifestacions d’os unionistas dende o 3 d’aviento, no aturan de remerar que o cenyo d’a mayoría d’os rechidors d’o Concello ye una clara victoria d’os nacionalistas (nombre aplicau nomás a os republicanos) y una ofensa intolerable a la democracia que encarna a lechislación cheneral d’o Reino Uniu. Chusto ye decir que os republicanos han prebau de no intervenir, tot y que continan preferindo que a bandera britanica no ondeye ni un solo día a l’anyo. En tot caso, interpretan a decisión d’os suyos representants en Belfast en o sentiu de que se tracta d’un compromís provisional ta no interferir masiau en a dinamica que habría de levar a l’exercicio d’o dreito a l’autodeterminación.

Por agora o balance d’as manifestacions presenta a imachen de policías que son enrestius y beluns d’ells ferius, arrestos de chent exaltada y a presa de posición d’o primer ministro d’Irlanda d’o Norte, l’unionista Peter Robinson, que ha qualificau o desorden provocau por os leyalistas de “inchustificable” y de “vergüenyoso”. Ye un desorden, ha dito, que favoreixe nomás a aquells que “buscan d’explotar qualsiquier oportunidat ta fer abanzar os suyos propositos terroristas”.

Fuent: http://www.nationalia.cat/ca/noticies/1306

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.