A Camara de Diputaus d’Uruguai apreba o matrimonio entre homosexuals

A Camara de Diputaus uruguaya apreba o prochecto de lei que permite o matrimonio homosexual. Habrá de pasar por o Senau que l'aprebará en a primer metat de 2013

O president d’Uruguai José Mújica. Foto: Wikipedia

Con o voto de 81 d’os 87 diputaus presents y dimpués de siet horas de debat, a Camara de Diputaus d’Uruguai ha aprebau o prochecto de lei que permite o matrimonio entre personas d’o mesmo sexo. Asinas mesmo, iste prochecto de lei permitirá a qualsiquier mena de parella, heterosexual u homosexual, cambear l’orden d’os apellius d’os suyos fillos.

Manimenos, o prochecto de lei encara ha de salvar un tramite, que ye o paso por o Senau, encara que a l’igual que en a Camara de Diputaus, o Frent Amplo d’o president uruguayo José Mújica tien a mayoría. L’aprebación definitiva s’aspera t’o primer semestre de 2013. Ista mida s’une a una serie de leis como a despenalización de l’alborto, ya en vigor, u a posible regulación d’a mariguana con fins recreativos.

Dica agora as personas d’o mesmo sexo en Uruguai podeban rechistrar-se como parellas y mesmo adoptar fillos pero no pas acomodar-se. D’ista traza, Uruguai s’unirá a atros estaus como Países Baixos, Belchica, Canadá, Espanya, Sudafrica, Noruega, Suecia, Portugal, Islandia, Dinamarca, Archentina y bells estaus d’os Estaus Unius, de Mexico y de Brasil que ya han reconoixiu o matrimonio homosexual.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.