A candidatura t’as eleccions europeas “Os pueblos deciden” se presienta en Zaragoza

En l'acto han charrau representants de Puyalón, EH Bildu y BNG, as tres formacions más importants d'a candidatura.

cartelIste chueves se ha presentau en Zaragoza la candidatura t’as eleccions europeas d’o venient mes de mayo clamada “Os pueblos deciden”. D’Aragón, i participa o partiu independentista Puyalón, acompanyau por EH Bildu, de Euskal Herria y BNG de Galicia, antimás de atras formacions soberanistas de Canarias y Asturias.

En a presentación, i han participau Zésar Corella y Txema Royo, de man de Puyalon, Sabino Cuadra, diputau en o Congreso espanyol por Amaiur, u Rosana Pérez, diputada en o congreso espanyol por o BNG. Ye a primer vegada que o partiu independentista aragonés se presienta a unas eleccions europeas, y han indicau que quieren “levar a voz, a rasmia y a voluntat d’a clase treballadera aragonesa ta ixas arias de poder, sin que isto supose lechitimar a suya existencia ni muito menos lechitimar a suya capacidat ta decidir sobre o nuestro pueblo”. “Os pueblos unius podemos concarar-nos con una Europa d’o capital que se mira más t’os intreses economicos de bancos y interpresas transnacionals, que por os intreses d’os suyos propios ciudadans”, ha dito Txema Royo, qui ha adhibiu: “Son os pueblos qui han de decidir“.

 Os representants d’as tres organizacions han presentau as suyas propuestas t’a Unión Europea. Os exes fundamentals, seguntes han declarau son a “esfensa d’o dreito d’os pueblos a decidir librement o suyo futuro y a critica radical a una Unión Europea que da la esquena a os ciudadans y imposa as suyas decisions a traviés d’a Troika”. Tamién han rematau fendo un clamamiento a la participación en as eleccions d’o venient 25 de mayo, ta que “a voz d’os pueblos s’ascuite en Europa”.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.