A casa Solans podría visitar-se

O Concello de Zaragoza y a ONU son fendo negociacions ta mirar de trobar bella formula de visitas t'o publico.

As asociacions de vecins d’o vico d’o Rabal son en momentos de conseguir una d’as suyas reivindicacions: fer visitable a casa Solans.

Iste edificio modernista, situau en l’avenida Catalunya de Zaragoza estió rehabilitada por o Concello d’a ciudat fa bellas anyadas, con un coste d’un millon d’euros y, en 2007 se cedió a Nacions Unidas ta fer-ie a siede d’a suya oficina de refirme a lo decenio de l’augua 2005-2015. Se costruyó en 1921 por orden de l’industrial d’a farina, Juan Solans y estió disenyada por l’arquitecto zaragozano Miguel Ángel Navarro. En as anyadas 60 quedó vuedo y bellas decadas dimpués, ya enronau, o concello se fació con a suya propiedat.

Hue ye edificio oficial d’a ONU y bi treballan seis personas. O vecinamen, dende fa tiempo ha veniu reclamando que Casa Solans tienga aprofeitamientos t’o vico y que se pueda visitar. China chana s’ha dau bell trango enta debant. Dende o pasau 25 d’octobre o patio d’a casa aculle una exposición de cartels graficos titolada “El agua es vida”. Ye a primer vegada que se fa servir o patio ta bella actividat publica.

Concello y Nacions Unidas son agora negociando cómo poder fer a casa visitable ya que, en estar edificio oficial d’a ONU, as midas de seguridat son prou furas y a chestión de permisos embolicada. Si tot va bien, a casa podría acullir visitas d’o publico a on que se podese viyer a casa y conoixer tamién o treballo d’a oficina d’a ONU que bi ye.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.