A Chacetania demandará a declaración de zona catastrofica

Sadaba treballa dende o mesmo viernes ta tornar t'a normalidat, mientres que os vecins d'a zona banyada por o río Aragón asperan aduyas que suavicen totz os danyos causaus

Dimpués d’un cabo de semana en o qual os vecins d’a val d’o Río Aragón no han aturau de mirar-se t’o cielo, agora as fuerzas de todas as localidatz afectadas por as creixidas se centran en tornar antis con antis a la normalidat. Ta aduyar a ixo, os alcaldes de Borau, Aísa, Castiello, Chaca Villanuga y Canfranc han confirmau que demandarán a declaración de zona catastrofica debant d’os mayusclos estricallos que ha causau l’augua.

Asinas s’ha decidiu en una reunión celebrada en o Concello de Canfranc, y asinas se transmitira a o Gubierno d’Aragón y a l’Executivo central. Seguntes informa Europa Press, l’alcalde d’ista localidat, Fernando Sánchez, ha asegurau que a zona cumple con os requisitos t’o nombramiento de zona catastrofica, mientres que ha subrayau que o río ya “no suporta creixidas” por o que requiere bella mena d’actuación d’urchencia.

As evaluacions son en marcha

Asinas l’ha confirmau Luisa Fernanda Rudi, presidenta d’o Gubierno d’Aragón, que mientres o cabo de semana no ha deixau de visitar totz os cantons d’a Comunidat afectaus por as inundacions. Debant d’os meyos de comunicación, ha asegurau que as evaluacions de danyos “ya son en marcha” con l’obchectivo de que os treballos de recuperación prencipien antis con antis.

Ta Rudi, ha estau “impresionant veyer como baixan os ríos, como s’han minchau parti de bella carretera”, unas declaracions que realizaba mientres a chornada d’o domingo, quan os cielos ya heban dau una tregua y a situación en a redolada s’estabilizaba. Una vegada que ha deixau de plever, será a daria d’as reunions. A primera d’ellas se ferá iste mesmo lunes, en a que Rudi chunto a o suyo equipo disenyará un plan de treballo ta que a zona recupere antis con antis a normalidat.

Fuent: http://www.aragon2.com/n-20353-4-Jacetania_solicitara_declaracion_zona_catastrofica

Una rispuesta a A Chacetania demandará a declaración de zona catastrofica

  1. Pingback: A Chacetania demandará a declaración de zona catastrofica | AraInfo | Achencia de Noticias d´Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.