A cifra de personas esqueferadas en Aragón se sitúa en 139.900, 4.100 menos, seguntes a EPA

Manimenos, a estacionalidat y a temporalidat continan estando as reinas d'a baixada d'as cifras d'ature. As cifras continan estando dramaticas y a población activa diminuye

Oficina de l'INAEM en Zaragoza (Foto: Aragón Sostenible)

Oficina de l’INAEM en Zaragoza (Foto: Aragón Sostenible)

S’han publicau as cifras d’a Enqüesta de Población Activa (EPA) dependient de l’Instituto Nacional d’Estadistica (INE), que cifra una baixada de 4.100 personas esqueferadas en Aragón en o segundo trimestre de l’anyo (una baixada d’un 2,9% respective a o primer trimestre), deixando a cifra total d’esqueferadas en 139.900 personas, un 21,92% d’a población activa, un 0,5% menos que no en o primer trimestre.

En o conchunto de l’Estau, as cifras d’ature se sitúan en 5.977.500 personas, una cayida d’un 0,9% respective a o primer trimestre de l’anyo (225.200 personas menos), deixando a taxa d’ature en un 26,26%. Istos datos refleixan a mayor baixada dende 2008, encara que as cifras d’esqueferaus y esqueferadas son mayors tanto en Aragón como en tot l’Estau que no fa un anyo.

En Aragón, por sectors ha baixau l’ature en totz fueras d’o sector servicios: industria (-3.100, -25%), agricultura (-2.000, -27,03%), construcción (-1.800, -16,22%). Tamién i hai 3.200 esqueferaus menos que no heban treballau encara antes (-4,19%). En o conchunto de l’Estau, baixa en totz os sectors: servicios (-157.900), industria (-37.500), construcción (-25.500) y agricultura (-24.200). Entre as personas que encara no han treballau puya en 23.500 personas y baixa licherament a cifra de personas esqueferadas de larga duración (mas d’un anyo) en 3.500 personas.

Manimenos, as cifras amuestran mas: a población activa ha diminuiu en 76.100 personas, y en un anyo ya son 349.100 personas menos; os contractos continan estando mayoritariament temporals (50.400 fixos menos por 162.200 temporals mas); o numero de treballadors por cuenta allena baixa en un anyo en 672.800 personas, puyando as cifras de treballadors por cuenta propia en 37.100 personas. Faltaría por conoixer as cifras de personas que se desapuntan d’os servicios d’emplego por desesperación u as cifras d’as personas que deciden d’emigrar pa trobar un treballo en l’extranchero. A temporalidat y a estacionalidat d’o treballo continan estando dominants en a baixada d’as cifras d’esqueferaus y esqueferadas.

Una rispuesta a A cifra de personas esqueferadas en Aragón se sitúa en 139.900, 4.100 menos, seguntes a EPA

  1. Pingback: Piden coherencia al consejero Bono que ahora “sí se cree” los datos de la EPA | AraInfo | Achencia de Noticias d´Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.