A comisión bilateral Aragón-Espanya remata sin guaires compromisos

Garra compromiso firme d'o gubierno espanyol en a trobada con José Ángel Biel, ripresentant aragonés

Imachen d'a trobada dentre José Ángel Biel y Soraya Sáenz de Santamaría

Imachen d’a trobada dentre José Ángel Biel y Soraya Sáenz de Santamaría

A comisión bilateral Aragón-Espanya remató ahiere con un compromiso d’o gubierno espanyol d’adhibir más diners a las partidas presupuestarias t’Aragón. Pero o compromiso no ha estau firme ni ha contau con una quantidat expresa. O ripresentant aragonés, o president d’as Cortz José Ángel Biel, s’amostró contento d’o risultau d’a trobada. Seguntes o propio gubierno os alcuerdos encara no son fixos y s’habran de negociar. En tot caso, bells meyos publican que istas quantidatz d’amilloramiento serían d’arredol de 65 millons d’euros, deixando o desfase presupuestario d’iste anyo en un 16%, en cuenta d’o 30% saliu d’o boligrafo d’o ministro espanyol de Ficienda Cristóbal Montoro. Amás, atros 30 millons d’euros irán endrezaus ta un plan especial ta Teruel que iste anyo s’heba suspendiu.

Dentre istos, s’ha destacau o cumplimiento d’o Pacto de l’Augua, que suposará enamplar o presupuesto ta Yesa y Biscarrués y t’as balsas laterals d’o Tastavins en o Matarranya, obra que ya ha estau anunciada como inminente a-saber-las vegadas. Todas istas actuacions sin quantidatz fixas. Amás, o ministerio espanyol de Fomento tamién s’ha comprometiu a adedicar más diners a obras en Aragón, encara que as principals inversions (que serían o desdoblamiento d’as dos carreteras con más puntos negros, N-II y N-232) no han aconseguiu a promesa firme de Fomento.

Biel tamién anunció que s’enamplará a plantiella d’a policia nacional espanyola adscrita a l’executivo aragonés dica plegar en os 150 miembros. En tot caso, encara que dende o gubierno aragonés y o suyo ripresentant que no ye parti d’o gubierno, Biel, s’amuestran optimistas, as comisions bilaterals, anyo zaga anyo, rematan con compromisos que encara no s’han cumpliu. Por eixemplo, o desdoblamiento ya estió sinyau como indispensable en a comisión d’o 2009, y tres anyos dimpués contina fendo-se asperar.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.