A comisión d’o Pacto de l’augua prioriza Almudevar y no descarta o trasvase

Continan entabant as polemicas obras de Biscarrués, Yesa, Mularroya u l'Alcherez

Biel y Arias Cañete (Foto d'archivo)

Biel y Arias Cañete (Foto d’archivo)

A reunión d’a Comisión d’o Pacto de l’Augua deixó ahiere marcadas as linias de treballo de l’anyada venient en lo que pertoca a la politica hidrolochica en Aragón. O filo suelto que i quedó estió a menaza d’un trasvase de l’Ebro que quedó sin aclarir. O ministro espanyol de Meyo Ambient y Agricultura Miguel Arias Cañete, no querió descartar ista obra y deixó a confirmación u no d’o trasvase a quan se fesen os Plans de Cuenca d’atros ríos peninsulars como o Tacho, o Xúcar u o Segura.

O ministerio espanyol metió como obra prioritaria a balsa d’Almudevar, que o suyo adchudicatario se conoixerá ta part de marzo de 2014. Ista ye a unica obra que se ha licitau en ista anyada. Atros entibos polemicos, como Biscarrués, Mularroya u lo recreiximiento de Yesa, tamién tirarán entabant en 2014. Tamién anunció a intención de fer o tamién contestau entibo en l’Alcherez, amán d’AiguaViva.

Cuanto a Biscarrués, Arias Cañete se comprometió a fer a licitación en 2014. D’o recreiximiento de Yesa, aseguró que se destinaría os diners que calesen ta guaranciar a seguridat d’as laderas y anunció un gasto de 42 millons d’euros en os presupuestos de l’anyo venient. Tamién se meterán atros 32 millons ta Mularroya, que contina aturau chudicialment, 17,1 ta Sant Salvador y 10,2 ta Santolea.

As declaracions feitas por o ministro iste verano, a on que no descartó a posibilidat de que se incluyise un trasvase dende l’Ebro enta atra cuenca hidrolochica, centroron buena parti d’o debat. O ministro continó sin descartar ista posibilidat, decindo que o nuevo Plan Hidrolochico d’Espanya yera encara “una fuella vueda”. As cinco collas parlamentarias refusoron, con muitos matices, ista posibilidat. O PAR remeró que o suyo pacto de gobernabilidat con o PP, empacha de fer qualsiquier trasvase. Arias Cañete aseguró, en tot caso, que se respetarían os más de 6000 hm3 que reserva l’Estatuto d’Autonomía vichent ta emplego d’Aragón.

A comisión estió presidida por o propio ministro y por Jose Ángel Biel, president d’as Cortes y diputau por o Partido Aragonés (PAR) , qui afirmó que Arias Cañete ye “o ministro que más en serio ha preso as reivindicacions d’Aragón y que ye cumplindo as suyas promesas”.

A oposición parlamentaria, manimenos, no tenió tantos afalagos. Dende CHA se criticoron as inversions en as obras de Yesa y Biscarrués y demandoron que se cambiase a politica hidraulica. IU remeró que, encara que contina a favor d’o recreiximiento de Yesa, caleba priorizar “as obras sin contestación social” y exichió a Cañete que descartase l’entibo de l’Alcherez. O PSOE, igual como a resta d’a cucha parlamentaria, s’amostró preocupau en no descartar-se o trasvase. Tamién o PAR demandó que a primer ringlera d’ixa “fuella vueda” estase que no se fese o trasvase dende l’Ebro.

 

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.