A Comisión Internacional de Verificación certifica que ETA ha escomencipiau o proceso pa meter as suyas armas “fuera d’uso operativo”

A organización armada ETA da un primer trango pa lo suyo desarme total, deixando fuera d'uso operativo bell armamento, seguntes a Comisión Internacional de Verificación

etaguardiacivilA Comisión Internacional de Verificación (CIV), ha anunciau hue en Bilbau que ETA “ha sellau y meso fuera d’uso operativo una cantidat d’armas y explosivos“. A CIV se creyó pa verificar l’alto o fuego d’ETA y o suyo fin de l’actividat armada.

A CIV acceptó en abril de 2013 una demanda d’ETA pa la verificación d’un proceso unilateral pa sellar y meter fin a l’uso operativo d’as suyas armas, munición y explosivos. A CIV accepto a propuesta d’ETA y en chinero d’estianyo se produció a primer verificación d’o proceso d’inventariau y de meter “fuera d’uso operativo” as armas.

Dita primer verificación estió gravada en vidio, que ha estau publicau por Naiz, a on puede veyer-se a dos verificadors internacionals, Ram Manikkalingam y Ronnie Kasrils, chunto a dos miembros d’ETA chunto a una mesa con armas y explosivos, a on verifican un documento con a lista d’armas fuera d’uso dada por ETA, sinyando todas dos partes en o mesmo.

A CIV creye que iste trango “ye creyible y significativo” y considera que iste trango previo menará ent’o desarme definitivo d’a organización armada, considerando a suya experiencia en atros procesos de paz.

Antiparte, o ministro de l’Interior espanyol, Jorge Fernández Díaz, ha declarau que “ye evident que tot o que siga abanzar en o camín d’a desaparición de ETA ye positivo y tot o que siga entregar as armas ye positivo, pero ixo no ye incompatible con o feito que se tracte d’una scenificación“.

O ministro considera que ye parte d’un proceso de “teatralización” por parte d’a organización armada y considera que os millors verificadors “son a Guardia Civil y a Policía”, recalcando que “o Gubierno y o Estau son treballando pa la disolución definitiva sin condicions d’ETA, treballando pa la redota total y definitiva d’ETA”.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.