A companyia d’autobuses HIFE esfiende l’autobús que no podió plegar t’Alcorisa

O coche de linia que iba dende Zaragoza dica Alcorisa habió d'aturar en Andorra, en estar ardendo una d'as suyas ruedas. Os viachants califican l'autobús de tercermundista.

Gara de Delicias (Foto: Wikipedia)

Gara de Delicias (Foto: Wikipedia)

A interpresa Hife, de man d’o suyo cherent, Jose María Chavarría ha esfendiu l’autobús que s’estricalló o pasau diya 3 de noviembre, entre que feba o trayecto Zaragoza – Alcorisa. O cherent dició que o vehiclo heba pasau a ITV y teneba totz os permisos, mesmo o de transporte escolar, seguntes informa El Diario de Teruel. Sí que ha reconoixiu que l’autobús “no ye o más nuevo que’n tienen”  y que “a chent ha d’entender que ye una linia deficitaria y cal amortizar os gastos”.

O testimonio d’un d’os viachers charra d’un autobús que califica de “tercermundista”. Seguntes Guillén González, “l’autobús tasamen podeba tirar enta debant en cada aturada, le costaba muito puyar as costeras, no podió ubrir o maletero porque yera engaronau y teneba as luces interiors penchando d’os cables”. Ta forro y bota, l’autobús habió d’aturar en Andorra a lo ran d’a mina a ciel ubierto porque una d’as ruedas yera ardendo.

Debant d’os feitos o chofer habió de baixar a amortar a rueda con l’extintor y aturar o viache. Guillén tamién denuncia que garra persona d’a interpresa i fué a escar-les y que cadagún, incluyiu o chofer, habió d’apanyar-se con autos particlars d’a familia u amigos ta poder plegar en o suyo lugar.

Dende a interpresa remeran que “ye normal que s’estricallen cosas” y aclaran que “a rueda no se cremó, estió una pastilla de freno que s’entrascó y fació una pudor maliza de tot”. Tamién dicen que garra usuario les ha presentau reclamacion.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.