A comunidat educativa recibe a o ministro Wert en Zaragoza

A comunidat educativa protesta contra os retalles mientres a visita a Zaragoza d'o ministro d'Educación espanyol Wert.

Arredol de 250 personas pertenecients a la comunidat educativa, mayoritariament estudiants universitaires, s’han concentrau iste maitín en Zaragoza frent a l’hotel Petronila a on o ministro d’Educación espanyol José Ignacio Wert acudiba a la clausura d’un congreso d’amostranza d’o sindicato CSIF.

Dica seis furgons d’a Unidat d’Intervención Policial d’a Policía Nacional espanyola han cusirau a concentración y os arredols de l’hotel, fendo identificacions y mesmo rechistros a bellas personas. Bells furgons d’a Policía han cusirau a marcha d’os estudiants dende o campus universitaire d’a Pza. S. Francisco dica l’hotel. A Policía no ha permitiu que a concentración salise d’a cera d’en frent de l’hotel, a arredol de 150 metros d’o mesmo, baixo menaza de pinyoras.

Os concentraus i han permaneixiu mientres una hora dica que a las 13:00 horas o ministro en auto oficial ha feito acto de presencia, momento en que a protesta s’ha feito sentir mas. S’han chilau en tot momento canticos en contra d’os retalles, en esfensa d’a educación publica de calidat y en contra d’a puyada de pres en a universidat, mientres china-chana iban amanando-se-ie mas estudiants.

Ahiere en as tres capitals aragonesas se realizoron manifestacions y atras accions en una chornada de luita en esfensa de l’amostranza publica de calidat. En l’edificio Interfacultatz d’a Universidat de Zaragoza prencipió un encierro indefiniu en protesta por os retalles educativos.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.