A comunidat aragonesofona celebra o diya d’a luenga materna

Asociacions y fablants han presto actividatz mientres tot lo diya en diferents partes d'o país

Manifestación por a igualdat d'as luengas en l'anyo 2009

Manifestación por a igualdat d’as luengas en l’anyo 2009

Iste viernes 21 se celebra en tot lo mundo o diya internacional d’a luenga materna. A calendata la trigó a UNESCO ta remerar a represión de l’exercito pakistaní contra una manifestación de fablants de bengalí en 1952, plegando a foter tiros con fuego real, en a ciudat de Dhaka, hue principal ciudat de Bangladesh. En Aragón, asociacions y organizacions en esfensa d’a luenga y cultura aragonesas han presto actividatz especials ta iste diya.

Softaragonés, por eixemplo, ha feito publica hue una nueva aplicación, fruito d’o suyo treballo. Telegram, l’alternativa más conoixida y popular a l’aplicación Whatsapp, ya ye disponible de baldes en aragonés ta toda mena de dispositivos movils que funcionen con Android.

A inciativa “A nuesta canta en aragonés“, que dende o suyo empecipiallo ha contau con firme actividat, ha puyau hue cinco nuevas cantas t’a suya pachina web, celebrando iste diya y deseyando que “a mosica no s’ature”. Con as de hue, ya son más de vinte collas as que participan en ista iniciativa.

Bells quantos alumnos y alumnas de l’Asociación Cultural Nogara, d’os dos libels que se i amuestran, han puyau tamién t’o rete un video deseyando a toda la chent que tien como luenga materna l’aragonés un buen diya y reivindicando l’amostranza de l’aragonés.

Radio Topo, una d’as emisoras libres de Zaragoza, s’ha sumau tamién t’as celebracions, puyando t’a suya web hue, os podcast d’a 3er chornada “D’estrela a estrela”, gravada o pasau 30 de noviembre, con tot un diya d’emisions de programas en aragonés.

Procheccions, charradas, rufiertas … de toda mena s’arroclan tamién iste diya en tot lo territorio. En Echo, os ninos serán os protagonistas d’os cuentos que leyerán de tardis en a escuela d’o lugar. Os vecins de Sandiniés han presto una “rufierta tensina” dende as 19:00. En Quart, l’Asociación Cultural Q-Arte, y o Rolde O Caxico, ferán una prochección d’o documental “Camille, o zaguer onso d’os Pirineus”, que tamién se podrá viyer en Exeya.  En Zaragoza, Javier Vispe presentará  os videos feitos por “A clica d’o Cinca – Cinqueta”, gravaus con os ninos y ninas d’o Centro Rural Agrupau Cinca Cinqueta. En Uesca, en o salón d’actos de l’IEA, Chuse Inazio Nabarro, Francho Nagore y Paco Bolea ferán una charrada sobre a lexicografía de l’aragonés y presentarán o “Tresoro d’a luenga aragonesa” en o rete. En Chaca, Silvia Cebolla, d’o sindicato estudiantil SEIRA, charrará sobre a “situación actual de l’aragonés”. Todas istas actividatz y bellas atras que se ferán en as venients semanas se pueden consultar en a web diyadaluengamaterna.blogspot.com.

Iste chueves se presentó, tamién con a enchaquia d’o Diya internacional d’a luenga materna, o documental Anvistas, feito por O Trango. Iste treballo achunta bellas voces de diferents sensibilidatz d’o mundo d’a esfensa de l’aragonés, tanto de fabladors patrimonials como de qui lo han aprendiu en as zaguers decadas. A presentación, en a DPZ, achuntó a más d’un ciento de personas.

En os retes socials se ye fendo servir o hashtag #dilm14, por as inicials de Diya Internacional d’a Luenga Materna, ta ninviar mensaches tocants a iste diya. Dende Arredol, queremos sumar-nos a istas celebracions y asperar que mientres muitas anyadas más pueda haber-ie chent que celebre o Diya Internacional d’a Luenga Materna en aragonés.

Una rispuesta a A comunidat aragonesofona celebra o diya d’a luenga materna

  1. Pingback: A comunidade aragonesófona celebra o dia da língua materna [ARG]

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.