A comunidat LGTBIQ torna t’a carrera a esfender os suyos dreitos

Como ye tradición, ahiere 28 de chunio a comunidat LGTBIQ salió t'as carreras de tot o mundo a esfender os suyos dreitos

Lectura d’o comunicau

Una anyada mas, atro 28 de chunio como viene estando habitual dende fa decenios, se commemora o conoixiu como “diya de l’argüello LGTBIQ“. Arredol de tot o mundo, se fa ista commemoración que tien como punto de partida o 28 de chunio de 1969 en Nueva York, con os disturbios que prencipioron en o bar “Stonewall Inn“, a on a comunidat homosexual s’enfrontinó por os suyos dreitos a la policía en una d’as continas escardas a iste colectivo que se feban ta par d’alavez.

A convocatoria zaragozana yera feita por “l’Asamblea 28J” en a Pza. San Miguel a las 20 h. refirmada por colectivos, asociacions, sindicatos, partius politicos y choventutz. O lema yera “Que no te toquen os dreitos”. Se i arrocloron unas 1.000 personas en un ambient festivo en o que se cantoron frases como “menos policía y mas orchías” u “Mariano sal de l’almario”, mientres de cabo ta quan en o recorriu tanyeba una batukada. L’ambient estió tamién coloriu con sinyals de l’arco de Sant Chuan, que representa a o colectivo LGTBIQ, sinyals republicanos espanyols u sinyals independentistas aragoneses. De Pza. San Miguel o recorriu fue por o Coso dica Chaime I enta dezaga d’a delegación d’o gubierno espanyol a on se leyó o comunicau final.

A manifestación teneba como obchectivo denunciar as menazas d’a crisi a iste colectivo asinas como a encara existent discriminación. A crisi ye fendo que os ataques a o colectivo LGTBIQ s’incrementen, mas que mas dende a dreita politica y a hierarquía catolica, seguntes denuncian os convocants.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.