A confiscación d’una parte d’os estalbios d’os chipriotas sobate a Unión

O president, Nikos Anastasiadis, aplaza dica maitín a reunión d'o parlamento que ha d'aprebar a mida y a oposición exiche ya a salida decamín de l'euro

corralito chipreO polemico rescate de Chipre traye conseqüencias. Por primer vegada s’ha crebau o tabú seguntes o qual os depositos bancarios yeran guaranciaus pasase o que pasase. Ya no. Totz os chipriotas han visto de rapiconté como, d’as suyas cuentas bancarias, desapareixeba entre un 6,7% u un 9,9% d’os diners. Isto, acompanyau d’un ‘corralito’ que empacha mover diners como minimo dica o martes. A gran pregunta ye como reaccionarán a resta d’os europeus y si no se desencadenará una retirada en masa de diners d’os bancos.

Hue yera previsto que o recient trigau president Nikos Anastasiadis reunise o suyo gubierno y tamién o parlamento, que ha d’aprebar formalment l’alcuerdo zarrau con a Unión Europea, pero finalment ha decidiu d’aplazar-lo previsiblement dica maitín. Os dos partius que refirman a o gubierno tienen a metat d’o parlamento, pero o resultau d’a votación no ye claro. I hai diputaus progubernamentals que s’han amostrau en contra d’as midas y podrían votar con a oposición. Os partius d’a oposición ya han anunciau que presentarán una moción ta abandonar de traza immediata a zona euro y mesmo demandarán un referendum sobre a permanencia en a UE.

Paralelament, ya i hai convocada una manifestación de protesta ta hue. En a carrera, as reaccions de sorpresa han deixau a largas y infructuosas codas debant d’as sucursals bancarias ta quitar diners. Y a una crispación que, por agora, s’ha aconortau con chicotas manifestacions espontanias debant d’as entidatz bancarias. I hai detalls concretos de l’alcuerdo que encara no se saben y que cheneran inquietut. O prencipal ye si a confiscación de diners afecta nomás a depositos u tamién bonos y cuentas corrients.

Entre os chipriotas ha causau estupor o feito de que todas as cuentas bancarias y no nomás as que superan una cierta cantidat sigan penalizadas con a confiscación d’una parte d’os estalbios. A operación, amás, s’ha feito a nueit d’un viernes que ubre un cabo de semana que ye de fiesta dica o martes, segurament ta que vague a o gubierno controlar millor a situación.

Qué pasará en a resta d’a Unión?

Mientres que pasan as horas, con tot y con ixo, o foco d’a tensión va chirando contra o conchunto d’a Unión. Totz se preguntan qué pasará o lunes quan ubran os bancos. Totz os gubiernos europeus s’han meso d’alcuerdo a decir que ye una mida extraordinaria que nomás s’aplicará en Chipre, pero ye dificil de preveyer si en atros países, especialment en Grecia, i habrá una retirada en masa de diners d’os bancos.

Oficialment a Unión Europea descarta que pueda pasar, pero o cierto ye que no pende d’ella.

Fuent: http://www.vilaweb.cat/noticia/4096082/20130317/confiscacio-estalvis-xipriotes-sacseja-unio.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.