A construcción d’as pistas d’atletismo, o fosal y a millora d’o suministro d’augua, prioridatz en Balbastro mientres 2014

L'alcalde y a concellera d'Hicienda han presentau o esbruixallo de presupuestos municipals, que asciende a mas de 14 millons d'euros

Foto: Concello de Balbastro

Foto: Concello de Balbastro

O presupuesto d’o Concello de Balbastro ta l’anyo 2014 asciende a 14.095.000 euros, o que suposa un lichero aumento respective a o de l’exercicio anterior. L’alcalde de Balbastro, Antonio Cosculluela, y a concellera d’Hicienda, Sonia Lasierra, han presentau istas cuentas, que agora han d’estar dictaminadas por a Comisión d’Hicienda y aprebadas por o Pleno.

Respective a o estau d’ingresos, s’obtienen 13.253.248,02 euros, un 94,03%, por operacions corrients, y o 5,97% restant, 841.751,99 euros, por operacions de capital. Por o que fa a os gastos, 12.227.032,07 euros, un 86,75% d’o total, se corresponden con gastos por operacions corrients, y 1.867.967,93 euros, o 13,25% restant, con gastos por operacions de capital.

Cosculluela ha explicau que se mantienen totz os servicios ufrius a os ciudadanos, asinas como as aduyas a os vicos, asociacions culturals, esportivas y asistencials, y aquellas concedidas a las asociacions ligadas a o desembolique d’a ciudat, como as d’interpresarios u as de promoción turistica.

Tamién ha sinyalau que a “capacidat economica d’o Concello sigue estando muit buena, con una deuda que ha descendiu significativament en os zaguers anyos y sin practicament recurrir a l’ampre. A nuestra voluntat hese estau incrementar mas os presupuestos, pus tenemos capacidat economica ta fer-lo, pero o teito de gasto no nos lo permite”.

Por o que fa a la incorporación de remanents, una vegada liquidau o presupuesto de 2013, l’alcalde ha apuntau que a lei no permite d’incorporar tot o remanent sino solament o superavit presupuestario d’os anyos 2012 y 2013, o que en o caso de Balbastro rondará os dos millons y medio d’euros, que previsiblement se destinarán a desembolicar inversions tanto en iste exercicio como en o venient.

Por a suya parte, a responsable d’Hicienda ha explicau que “estando conscients d’a dificil situación economica que travesamos, hemos elaborau un documento austero, realista y muit responsable, mantenendo-nos fidels a la fuella de ruta seguida entre os zaguers anyos, en a qual entre as nuestras prioridatz destacan as aduyas a las asociacions d’a ciudat, prencipalment a las asistencials, que anyo sin atro veyen retallaus os suyos presupuestos”.

Inversions

En o capitol d’inversions, que asciende a un total de 795.558,40 euros, a o que caldría sumar os 104.193,59 euros destinaus a l’Aria de Rehabilitación Integral (ARI), destaca a construcción d’as pistas d’atletismo en o marco d’o Plan Integral d’Equipamiento Esportivo. Cuenta con un montant de 285.849,02 euros procedents d’una subvención d’o Gubierno d’Aragón a la que se sumarían, una vegada liquidau o presupuesto, l’aportación municipal, que asciende a 147.255 euros.

Amás se destinarán inicialment 40.000 euros a las obras de construcción d’o nuevo fosal municipal, partida que se veyerá suplementada con a incorporación de remanents; 213.291 euros a traviés d’a DChA dirichius a la execución de prochectos de millora d’o suministro d’augua d’a ciudat; y 144.918 euros a la continación d’as obras d’acondicionamiento d’o Moliné, que acullirá a siede d’o Centro d’Estudios y Recursos d’a Memoria d’as Migracions d’Aragón, procedents tanto de recursos propios como d’una subvención d’o CEDER.

Antiparte, o Concello continará con a suya aportación anyal t’as subvencions d’o programa de l’Aria de Rehabilitación Integral (ARI), que en iste exercicio asciende a 104.193,59 euros. Istas aduyas contribuyen a la reactivación economica d’un sector muit castigau por a crisi como ye a construcción pus, a l’aportación municipal se suman os montants d’o Gubierno d’Aragón, o Gubierno central y a cantidat aportada por os propietarios d’as viviendas que van a estar rehabilitadas.

O presupuesto contempla una partida de 20.000 euros dirichida a la redacción de l’abantprochecto t’a construcción d’a depuradora d’o Poligono Industrial Val d’a Cinca y unatra de 10.000 euros ta l’apanyo y a reparación de camins d’a ciudat. Tamién se bi incluyen atras partidas de quantías inferiors ta l’acondicionamiento y equipamiento d’edificios municipals, a millora d’a sinyalización vial, a millora d’o mobiliario urbano u l’adquisición d’instrumentos mosicals y material inventariable d’a Biblioteca municipal.

O Concello mantiene as suyas aportacions a aquellas institucions u organismos que realizan una important labor t’o creiximiento y desembolique d’a ciudat, como ye o caso d’a Fundación Ramón J. Sender (215.220 euros), a Institución Ferial de Balbastro (180.000 euros), o Patronato Municipal d’Esportes (602.263 euros), Balbastro Social Lavandería y Limpieza (136.631 euros) y a Fundación Municipal de Servicios Socials (13.675 euros). Ista fundación ha visto diminuiu o suyo presupuesto pus o montant restant dica os amán de 30.000 euros d’exercicios anteriors será chestionau dreitament por a comisión de Rechimen Interior y Bienestar Social, seguntes ha explicau a Concellera d’Hicienda, con a finalidat d’achilizar a suya chestión.

Desembolique, Educación, Cultura y Choventut

En l’aria de Desembolique, se mantiene a partida de 110.000 euros t’a concesión d’aduyas a o Fomento de l’actividat industrial y a l’emplego estable y de calidat. Amás,  se destinan 50.000 euros a o funcionamiento d’o Foro Economico y Social, y 33.500 euros a l’Asociación t’a promoción turistica d’o Semontano.

L’aria de Cultura mantiene o mesmo presupuesto de 2013, ye dicir, 117.875 euros, con a finalidat de continar en a mesma linia de programación que en os zaguers anyos. O mesmo ocurre con Educación y Choventut, que reeditan programas como l’Aula en Bici. O Programa d’Obridura de Centros u os cursos, tallers y chornadas, formativos y d’ocio, ofertaus dende o Espacio choven.

En a mesma situación se troba l’aria de Bienestar Social, que mantendrá iniciativas como o Programa d’Aduya a la Prevención d’as Drogodependencias y as aportacions a o Servicio Social de Base y a la aduya a domicilio d’a Comarca d’o Semontano, asinas como a partida d’aduyas socials d’emerchencia, que asciende a 50.000 euros, 10.000 mas que en l’exercicio anterior.

En zagueras, as partidas de festeixos populars y desembolique de festeixos taurinos se mantienen de raso igual que en 2013, ascendendo a 215.000 euros, pus en totz dos zaguers exercicios se realizoron importants reduccions, concretament amán d’un 30 por cient.

Gasto corrient

Sonia Lasierra sinyala que “o gasto corrient d’o Concello engloba totz os servicios que s’ampran a o ciudadano, dende l’alumbrau publico dica o cudiau de parques y chardins u a replegada de vasueras. Dito gasto ha aumentau licherament respective a l’exercicio anterior igual que ha ocurriu en totz os fogars. As continas puyadas d’a luz, que en o caso de Balbastro no solament se tracta d’aquella que gastamos ta alumbrar as carreras d’a ciudat, sino tamién a d’os edificios municipals u d’os colechios, ha feito que istas partidas haigan de veyer-se incrementadas, ya que hemos de pagar mas por os mesmos servicios, igual que le ocurre a totz os ciudadanos”.

Fuent: http://www.cronicadearagon.es/wordpress/?p=47075

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.