A Coordinadera Biscarrués viachará iste viernes ta Zaragoza pa convidar a Rudi a beber augua con lindano

A Coordinadera amás solicita a o Gubierno aragonés información d'a situación y d'as midas que va a prener

Alcaldes y representants d'os lugars afectaus. Foto: Arainfo

Alcaldes y representants d’os lugars afectaus. Foto: Arainfo

A Coordinadera Biscarrués-Mallos de Riglos ha remitiu un escrito a la presidenta d’o Gubierno d’Aragón, Luisa Fernanda Rudi, pa que reciba iste viernes 3 d’octubre a las 18.30 horas en o Edificio Pignatelli de Zaragoza a o suyo president Jesús Estachod Vinué de conchunta con representants de quantos lugars d’a compleganza d’o río Galligo con l’obchectivo de convidar a Rudi a tomar augua d’o río Galligo con lindano que, seguntes o suyo gubierno, ye “buena pa la salut” y asinas “podrá contrimostrar-lo en persona”.

Asinas mesmo a coordinadera solicita que informe en primer persona d’as causas d’ista situación y as midas que o suyo gubierno va a prener pa solucionar-lo. “Dada a gravedat d’ista estrafalla medioambiental nos fería goyo de sentir a cercanía y solidaridat d’a presidenta aragonesa como asinas l’ha feito en atras ocasions con atros territorios que han sufriu atros danyos”, adhiben.

Le pedimos amás dimpués de 30 anyos d’acumulación de papels, o descarte definitivo d’o Prochecto d’o pantano de Biscarrués y a inversión d’ixos diners en a limpieza d’o río Galligo pa que podamos tornar a beber a suya augua con seguridat”, concluyen.

Pa plegar ta Zaragoza, a Coordinadera ha organizau o “bus d’o lindano” que partirá o viernes dende Santolaria (17.00 horas) replegando a chent en a benzinera d’Ayerbe (17.10), Biscarrués (17.20), Ardisa (17.25) y Piedratallada (17.35). Tamién i habrá aturadas en Villanueva y atros lugars d’a ribera.

Alcaldes d’os municipios afectaus se reunen pa tractar o problema d’o lindano en o Galligo

Por a suya parte, iste luns se reunioron en Santolaria as y os alcaldes u representants d’os concellos de: Caldearenas, As Penyas de Riglos, Moriello de Galligo, Santolaria, Biscarrués-Erés, Piedratallada, Ardisa-Casas d’Esper, Lupinyén-Ortilla-Montmesa, Marracos, Villanueva, Villamayor, Almudevar y Farlete (en representación d’a Mancomunidat d’Auguas) manifestament preocupaus por a contaminación de lindano en o río Galligo.

Dimpués d’analisar a situación particular y cheneral, conscients que son representants de personas usuarias d’o río Galligo en as suyas diversas variedatz (augua de boca, riego, alimentación de bestiar, usos ludicos y turisticos, etc.), como representants de l’administración publica amuestran o suyo “total intrés” en “treballar d’a man con as comarcas, o Gubierno d’Aragón, CHE, y quantas administracions s’involucren en treballar pa resolver o problema y as conseqüencias que ha teniu y puede tener no solament en suministro sino en agricultura, ganadería, industria y turismo como usuarios y consumidors de l’augua d’o río”, explican en una nota de prensa.

Asinas mesmo amuestran a suya satisfacción por “a rapidez y eficacia” en l’actuación d’os servicios de Protección Civil, emerchencias y Bombers “en guarenciar o suministro d’augua de boca de forma continada y eficient a os lugars afectaus”.

En dita reunión, alcordoron de solicitar a o Gubierno d’Aragón a restauración d’os sistemas de suministro d’augua de boca en totz os municipios afectaus de traza que puedan suministrar augua con guarencia sanitaria suficient y dotar a totz os municipios que se suministran d’auguas d’o Galligo, de fuents d’augua seguras difuera d’a compleganza pa privar “iste problema que puede repetir-se en o futuro”.

Amás, piden descontaminar os tres puntos conoixius de contaminación: Verteders de Bailin y de Sardas, a propia planta d’Inquinosa y estudiar o estau d’os bardos acumulaus en o entibo d’a Penya asinas como investigar atros puntos de vertiu incontrolau arredol d’o cauz y afluents.

Finalment, solicitan una millor información sobre os sistemas de control, as freqüencias, l’aumento d’as mesmas y os resultaus de totz os municipios, que sían transmitius a os interesaus. “No se considera oportuno que a información sía penchada exclusivament en una web. Asinas mesmo se pide mayor información sobre l’afección a la salut d’as personas, animals y productos agricolas”, adhiben.

Uns acuerdos que transmitirán a o Gubierno d’Aragón y a la Confederación Hidrografica de l’Ebro, asinas como a os grupos politicos con representación en as Cortz d’Aragón.

Fuent: http://arainfo.org/2014/09/alcaldes-de-los-municipios-afectados-se-reunen-para-tratar-el-problema-del-lindano-en-el-galligo/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.