A corrida solidaria “Chislas ta Nicher” en Teruel replegará diners ta prochectos de desembolique

Os diners que se repleguen irán ta conseguir que os ninos y ninas de Nicher tiengan millors accesos a l'augua potable.

Presentación d'a corrida (Foto: Concello de Teruel)

Presentación d’a corrida (Foto: Concello de Teruel)

UNICEF, a traviés d’os suyo programa d’Amostranza t’o Desembolique “Enreliga-te con UNICEF”, presenta por cinquena anyada as “Corridas de l’Augua”, aintro d’a campanya de movilización escolar “Chislas ta Nicher”.

En Teruel ista corrida se ferá o viernes 22 de marzo a las 18 horas en o Parque d’os Fueros, con un recorriu de bells 2.000 metros, encara que bi habrá tamién un recorriu más curto t’os más chicotz y un dorsal zero ta qui quiera aduyar-ie sin fer a corrida. A venda de dorsals, a 3 euros, prencipiará a las 16 horas en o parque. En rematar a preba bi habrá una lifara t’os participants patrocinada por l’Asociación de Comerciants “Ensanche Fuenfresca”.

Seguntes ha explicau a delegada de UNICEF en Teruel, Concha López, ista corrida solidaria ye ubierta t’a participación de tot lo mundo. As “chislas” conseguidas en cada corrida u evento esportivo a favor d’ista campanya son destinadas a la financiación de programas de UNICEF en Nicher. En Teruel, en l’anyada pasada i participoron bellas 200 personas.

Sin augua potable os ninos y ninas viyen vulneraus o suyo dreito a la salut, a la educación y a la protección, ya que son victimas de malotías de diarreas, pierden tiempo indo a mirar augua potable a kilometros de distancia, perdendo clases por ixo y arriscando-se a secuestros u enrestidas por o camín”, explica a delegada de UNICEF en Teruel.

A falta d’augua y instalacions de saneamiento en as escuelas tien muito que viyer con l’albandono escolar temprano en Nicher, más que más en o caso d’as ninas, que en plegar en l’adolescencia, no cuentan a soben con qualcosa tan simpla como una letrina con una puerta ta privar as uelladas d’otri.

A educación ubre a puerta t’a salut, a traviés d’a promoción d’a hichiene y os costumbres saludables en as escuelas, y a salut favoreix a educación, en empachar que l’alumnalla faiga fuina por malotías relacionadas con l’augua que se pueden prevenir”, remata López, animando a totz os teruelanos a participar en a corrida.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.