A craba montesina tamien se censa

O mes d'adviento ye una d'as millors epocas ta uellar a istos ungulaus silvestres.

Achents de Protección d’a Naturaleza d’o Gobierno d’Aragón, dependients d’o Departamento d’Agricultura, Ganadería y Meyo Ambient, han encetau un d’os quatre censos simultaneos que se fan de traza anyal ta conoixer con más precisión a distribución y o numero poblacional de craba montesina, especie salvachina que en os zaguers anyos ye extendillando-se por nuevos territorios dende a Reserva de Caza d’os Puertos de Beceite y pasa a ocupar arias naturals agrestes de sierras penyascos y roquedos d’a metat sur d’Aragón.

 

O coordinador d’os Achents de Protección en l’Aria Meyo Ambiental de Carinyena, Tomás Albero, ha explanicau que “ye un d’os intes de l’anyo en que mas visteras son as crabas montesinas y quan se deixan amanar más”. En estar en epoca d’estro, ha matizau, “son son tan fuyidizas”. Albero y cinco achents de protección d’a naturaleza más d’a suya redolada, son en istos días reyalizando os censos simultaneos de crabas montesinas ta ista parti d’a provincia de Zaragoza.

Craba montesina en una zona a mán de Carinyena. (Foto: Lucía López Marco)

Por as sierras d’o Sistema Iberico y a val d’a Uerva reyalizan dende l’anyo 2006 bells trayectos u recorrius lineals, s’asoman a os puntals u sallents d’o terreno y asinas, con aduya de prismaticos y un auto de refirme van contabilizando os exemplars uellaus. En fichas de campo s’anota a suya localización, o sexo, a edat d’os exemplars -determinada en función d’a cornamenta- y atros datos d’intrés ta conoixer millor a la especie, a suya distribución y poblacións. “En ista zona d’o Campo de Carinyena os primers exemplars se prencipión a uellar en l’anyo 2001”, ha indicau o coordinador. “Hué podemos veyer collas grands, de dica 47 exemplars”, ha adibiu.

 

Dimpués, os censos reyalizaus permiten conoixer millor istas poblacións en expandidura y tamien reyalizar un control poblacional d’a especie de cara a posibles mals a os cultivos lenyosos, vinyeus y campos d’almendro. Iste anyo, por ixemplo, s’han dau permisos de caza y precintos a os cotos, de dos masclos y dos fembras, como una actividat cinechetica excepcional ta ista redolada d’a provincia de Zaragoza an que dica agora no se permitiba a captura d’ista especie cinechetica.

 

D’atra man, d’entre noviembre y adviento prencipia a epoca d’estro d’a craba montesina. Os masclos de grand cornamenta se reunen en collas familiars, acompanyaus d’as fembras y d’atros masclos con os que se barallan a supremacia de l’harén, en una contienda espectacular.

Fuent: http://www.comarcas.es/index.php/mod.noticias/mem.detalle/idnoticia.6554/relcategoria./chk.2773c79a154ed5efd809d37d9e5cfe46.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.