A Cucha d’Aragón solicitará aduyas europeas contra a despoblación

O diputau Chesús Yuste demandará istas aduyas t'as provincias de Teruel, Soria y Cuenca, d'as que mas paten a despoblación en o Estau espanyol

O diputau Chesús Yuste en o Congreso (Foto: CHA)

O diputau Chesús Yuste en o Congreso (Foto: CHA)

O diputau de CHA por a Cucha d’Aragón defenderá a semana venient en o Parlamento espanyol una moción conseqüencia d’a interpelación urchent que dirichió a o gubierno de Rajoy relativa a la politica d’o suyo executivo en relación con a reconoixencia d’as comarcas de Teruel, y tamién de Soria y Cuenca, como zonas tasament pobladas dentro d’a Unión Europea, a fin de recabar as aduyas que os fondos estructurals y o fondo social europeu preveyen t’as zonas con ixa problematica.

“Recordamos que ista moción ye una iniciativa dimanant d’una interpelación parlamentaria que se realizó o pasau mes de mayo, pero que con motivo d’o reachuste de sesions parlamentarias con motivo de l’abdicación d’o Rei, ha estau aplazada dica a semana venient, estando incluida en l’orden d’o diya en a sesión d’o martes, encara que en figurar como a tercera y zaguera moción con toda probabilidat se debatirá o mierques diya 25 y se votará o chueves 26”, explican dende a Cucha d’Aragón.

En iste sentiu Chesús Yuste afirma que “cal fer chusticia con territorios como Teruel y recabar fondos europeus que contribuigan a paliar os problemas derivaus d’a despoblación. O pleno d’o congreso d’os diputaus tien una oportunidat con ista moción emparando ista iniciativa que conta con o refirme unanime tanto d’o Concello de Teruel como d’as Cortz d’Aragón. Amás bi incorporamos una propuesta, que ha estau elaborada en colaboración con a Confederación Interpresarial Turolense, dimpués de mantener una serie de reunions en Teruel, que permitiría recibir aduyas por valor d’uns 160 millons d’euros anyals entre os venients seis anyos con os fondos europeus que va a recibir o Estau espanyol y que encara no han estau distribuius entre as CCAA, baixo a formula d’Inversión Territorial Integrada”.

Dende a Cucha d’Aragón, coalición electoral formada por CHA, IU y a Inicativa Social, recordan que “a parte dispositiva d’a moción d’o diputau aragonesista indica textualment que: O Congreso d’os Diputaus, conscient d’a grieu desavantalla que t’o desembolicamiento d’as provincias de Teruel, Soria y Cuenca suposa a suya gran despoblación, insta a o Gubierno a: Realizar debant d’a Unión Europea as accions necesarias t’a reconoixencia d’as provincias de Teruel, Soria y Cuenca como zonas tasament pobladas a fin de recabar as aduyas que os Fondos Estructurals y o Fondo Social Europeu preveyen t’as zonas con ixa problematica, y emparar expresament as chestions que son realizando en instancias europeas dezaga d’ixe obchectivo as confederacions interpresarials de ditas provincias.  En caso de no aconseguir o primer obchectivo, destinar a lo menos o 20% d’os fondos europeus que percibirá o Estau espanyol t’o periodo 2014/2020 y que encara no han estau distribuius entre as Comunidatz Autonomas a financiar a Inversión Territorial Integrada que constituigan as provincias de Teruel, Soria y Cuenca ta que puedan fer frent a o desafío d’a despoblación”.

Fuent: http://arainfo.org/2014/06/la-izquierda-de-aragon-solicitara-ayudas-europeas-contra-la-despoblacion/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.