A “Cucha Plural” exiche a democratización d’o Banco Central Europeu

Representants de IU han notificau con una cedula d'esfuizamiento a una sucursal de banca, ta simbolizar o deseyo de rematar iste conflicto

Imachen de l'acto A candidatura aragonesa d’a Cucha Plural ha denunciau os efectos d’a crisi d’o sistema de banca privada, fendo un mensache de recheneración democratica en as institucions financieras europeas, como lo Banco Central Europeu (BCE). “Os rescates son un sinyal d’o fallo d’o sistema bancario privau, que prioriza os suyos propios intreses antes que favoreixer l’intrés publico”, ha sinyalau Paco Iturbe. Asinas mesmo, o candidato independient ha exichiu que “lo primer habría d’estar que arribase o credito t’as familias y as interpresas, promover una economía productiva y no pas especulativa, como dica agora”.

Ye por ixo que, ta simbolizar o deseyo de cambiar o drama social d’os esfuizamientos, A Cucha Plural ha notificau iste maitin a una sucursal bancaria a suya orden de esfuizamiento con una cedula.

D’atra man, o candidato Alberto Cubero, ha deixau claro que “dende a Cucha Plural esfendemos un BCE a o servicio d’as personas baixo control democratico d’o Parlamento Europeu: que sigan os eurodiputaus qui esleixan qui lo va a menar y no a banca privada”. En iste sentiu, Cubero ha denunciau a sinchusticia que suposa que “dende Espanya hemos alportau 700 millons d’euros a lo BCE, que dimpués s’han feito servir ta financiar a la banca privada, entre que dimpués ells lo ampran a un obsceno 7% a los ciudadans”. Ye por ixo que Cubero ha sinyalau que “si tenesenos una verdadera banca publica en Espanya, podríanos financiar-nos correctament dende o BCE”.

Cuanto a las propuestas d’a Cucha Plural t’a reforma d’o sistema fiscal, Bea Izuel ha reclamau “una fiscalidat más chusta y progresiva, que pague más qui más en tien ta guaranciar a redistribución d’a riqueza con uns servicios publicos de calidat y accesibles ta totz os ciudadans”. Entre as midas de politica fiscal d’a Cucha Plural, Beatriz Izuel ha destacau la importancia de que as rentas d’o treballo y as rentas d’o capital coticen igual, proposando un tipo d’o 35% t’as interpresas con más de un millón d’euros d’esquilment. D’atra man, ha sinyalau que cal derogar a lechislación de l’IVA de Mariano Rajoy, l’impuesto indirecto más inchusto, y ha tornau a meter dencima d’a mesa la urchencia de acotolar os paradisos fiscals en a Unión Europea.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.