A cucha s’imposa en as lechislativas y Hollande no tendrá mugas a o suyo poder

En as eleccions lechislativas francesas celebradas ahiere, o Partiu Socialista ha obteniu a mayoría absoluta en l'Asamblea Nacional

Foto: Partiu Socialista Francés

As eleccions lechislativas francesas han teniu una participación bien baixa, arredol d’o 56%, pero isto no ye un obstaclo t’a gran victoria d’as cuchas, que han captau a mayoría absoluta de l’Asamblea Nacional. Sobre os 577 diputaus d’a cambra, os socialistas han consiguiu arredol de 290 cadieras, mientres que a resta d’os partius de cucha n’han reuniu quasi una trentena mas.

Antiparti, l’UMP ha padeixiu una severa redota y ha obtenido 213 diputaus. Os atros partius de centrodreita han reuniu 20 cadieras mas. Con istos resultaus, o president François Hollande podrá gubernar sin garra obstaclo, mientres que a centrodreita habrá de dentrar en un periodo de reflexión y d’analís que le permita trobar un nuevo candidato ta concarar tiempos millors aintro d’o futuro.

Una d’as anecdotas d’a nueit ha estau a redota de Ségolène Royale, que estió vencida aintro d’a suya circumscripción por o candidato indocil socialista Olivier Falorni. Cal remerar que a companyera sentimental de François Hollande, Valérie Trierweiler, amostró a traviés de Twitter o suyo refirme a Falorni, y asinas se declaró contra Royal que ye a exmuller d’o president y a mai d’os suyos quatro ninos.

Por primera vegada dende 1988, o Frent Nacional (FN) tornará a posar-se aintro de l’Asamblea Nacional. A tamás de que a la suya candidata Marie Le Pen le ha faltau chusto-chusto ta obtener una cadiera, o partiu fundau por  su pai ha obteniu dos diputaus, uno ye por a suya nieta Marion Marechal-Le Pen. Tamién un exsocio d’o FN, l’alcalde de Aurenja Jacques Bompard, ha estau trigau diputau.

A nueit electoral ha teniu encara dos noticias mas. A primera ye o resultau catastrofico d’o MoDem, que ha obteniu nomás que dos cadieras, y o suyo candidato, François Bayrou, ha perdiu aintro d’a suya circumscripción de Pau. Atro cariz tien o gran exito d’Europa Ecolochía-Os Verdes, que han obteniu 20 diputaus contra totz os pronosticos.

Aintro de l’ambito d’os partius rechionalistas y autonomistas, cal sinyalar o feito historico de que un autonomista bretón, Paul Molac de l’UDB, tendrá voz y voto aintro de l’Asamblea Nacional. A resta d’os candidatos autonomistas de l’Exagòn no tienen garra cadiera, pero bells anyos han obteniu resultaus muit notables. Ye o caso d’o rechionalista savoyano Gilbert Saillet, que ha estau venciu por 17 puntos, u os dos candidatos nacionalistas corsos que no tienen cadiera pero que han captau rans de sostén electoral que contrimuestran a fortaleza d’o movimiento nacional corso.

Dillá de l’exito bretón, l’atra gran sorpresa d’a nueit electoral ha plegau de Martinica, a on o nacionalismo d’a isla ha obteniu un exito sin garra precedent. Dos diputaus independentistas se posarán aintro de l’Asamblea Nacional y dos autonomistas o ferán tamién. Antiparti, o movimiento independentista canac (Nueva Caledonia) no tien capacidat de trahier a o suyo candidato ta París, pero ha obteniu un resultau que evidencia que o soberanismo d’ixa isla ye mas vivo que no nunca.

Fuent: http://www.jornalet.com/nova/399/lesquerra-simpausa-a-las-legislativas-e-hollande-aura-pas-de-limits-al-sieu-poder

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.