A cullida de cerial de qualques comarcas en periglo por a falta de plevia

A falta de plevia mete en risque lo cerial de secano en Monegros, Cinca Meya y Baixa y A Litera

Anvista d'un campo (Foto: Asaja)

Anvista d’un campo (Foto: Asaja)

A calor d’istas zaguers semana confirma a medrana que os agricultors d’as comarcas de Monegros, Cinca Meya, Baixa Cinca y a Litera teneban. Si no pleve en os venients diyas, a cullida de cerial d’hibierno podría perder-se.

As radidas plevias de l’hibierno, que quan plegaban veniban seguidas de firme airera que a escape ixucaba la tierra, han feito que o cerial remate a hibernada con poca rasmia, pero ye la calor d’istos diyas la que los ye acotolando de tot.

En parolas de José Fernando Luna, portavoz  de Asaja Uesca, “os animos d’os agricultors son por tierra. Somos viyendo  como toda la faina y las inversions que hemos meso en os nuestros campos se van a perder en caso de que no pleguen plevias de camin. As prediccions meteorolochicas pronosticaban plevias que no son plegadas, acabando con l’asperanza d’apanyar ista situación”.

“A zona afectada ye prou ampla, se tracta de tot lo tercio sur d’a provincia de Uesca, estando la muga superior t’a part d’Almudevar. Os secanos más frescos d’a zona d’a Plana de Uesca y Semontano son prou bien, encara que si contina ista calor, a escape demandarán plevia. En o caso de Chacetania, Alta Galliguera, Sobrarbe y Ribagorza, a situación ye buena, podendo aguantar encara sin plevias”, adhibe Luna.

O portavoz d’Asaja remata asperando que “os pronosticos meteorolochicos fallen en ista enchaquia a la nuestra favor y pleguen as plevias que serían a nuestra salvación. En o caso d’os agricultors d’istas zonas de secano, lo buen orache ta Semana Santa sería que plegase plevia“.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.