A Delegación d’o gubierno espanyol “se blinda” en as primers protestas d’a Marea Ciudadana

Bells ciudadans han habiu d'asperar en as puertas de Delegación mientres horas ta presentar instancias contra la politica economica y social.

DelegacionEn o que talment siga o diya más fredo d’iste hibierno en Zaragoza, bellas decenas de personas han habiu d’aguardar en as puertas d’a Delegación d’o gubierno espanyol ta poder presentar una serie d’instancias contra as politicas economicas y socials d’o gubierno menau por Mariano Rajoy. Ista yera a primer d’as protestas d’o 23 de febrero, un diya esleixiu por diferents “mareas” y movimientos socials ta demandar cambios en as politicas y protestar contra “o golpe d’estau financiero”.

A las 11 d’o maitín bellas decenas de personas se presentaban en a Delegación ta presentar unas instancias. En ellas “s’exiche a derogación d’a reforma constitucional, d’a reforma laboral, y de todas as reformas de l’atraco que nos son fendo a las chents d’abaixo“, explicaba Pepe, una d’as personas que feban ringlera. Representants d’os que i yeran asperando han puyau a charrar con o Delegau d’o Gubierno espanyol qui, en un primer inte, les ha permitiu remanir baixo os porches. Manimenos pocos minutos dimpués cambiaba d’opinión y establiba un cordón policial en os porches, deixando sin cubillar a los que i asperaban. Antimás, no les deixaba dentrar-ie que de seis en seis, habendo de remanir toda la resta d’a chent en a carrera, aguantando prou fredor y cierzo.

“En primeras nomás permitiba a entrega d’una instancia por persona. Quan hemos visto que isto iba a durar masiau hemos prebau de tornar a charrar con ell [o delegau], pero en ista ocasión no ha quiesto charrar-ne”, contaba Andrea, una d’as primers en plegar-ie. “No bi ha habiu garra mena de negociación. Ha baixau o guardia civil que yera en a puerta y nos ha dito que permitiban dica nueu instancias por persona”.

“Entre os que han pasau y os que son aintro en levaran presentadas bellas cinquanta“, continaba Andrea. A la 13:00, dimpués de dos horas chelaus, encara no sabeban quan remataría a protesta. “Ta urchencias tamién pasaremos de seis en seis ista nueit”, deciba de traza somarda una atra d’as personas presents.

Mientres tot lo diya, a “Marea Ciudadana”, nombre que arrocla a las mareas verda, blanca, narancha, roya, amariella, violeta y azula, y organizacions de toda mena, han convocau actos por tot lo país: bi habrá manifestacions u aicions en Zaragoza (19:00 Plaza d’o Pilar), Uesca (19:00 Plaza Navarra), Teruel (19:30 Plaza Sant Chuan), Monzón (18:30, centro ciudat), u Alcanyiz (18:00 Plaza Espanya) y en atros lugars como Chaca u Binefar.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.