A Denominación d’Orichen Carinyena “fa calentar motors” ta una nueva Fiesta d’a Vendema

O Paseu d'o Vin quedará ubierto o sabado 1. Juan Echanove será l'encargau d'enchegar a Fuent d'a Mora

Aquells que rematoron enamoraus de l’ambient d’o Salón d’o Vin d’as Piedras tienen una cita ta repetir experiencia, y con mas alicientes si se puede. Y ye que a Denominación d’Orichen Carinyena ha presentau a suyo 46º edición d’a Fiesta d’a Vendema, que se celebrará en a localidat zaragozana de Carinyena os venients 1 y 2 de setiembre. Una feria que o suyo obchectivo no ye atro que celebrar o prencipio d’a recolección d’a uga y que, estianyo, trahie importants novedatz con a misión adhibida de continar promocionando os vins d’a DO chunto a os platos mas tipicos d’a gastronomía aragonesa.

José Luis Campos, Director Cheneral de Marketing d’a Denominación d’Orichen Carinyena, ha estau l’encargau de ‘descorchar’ os detals que ya asperan a totz aquells que se desplacen ta desfrutar d’una fiesta unica en Aragón. O primer d’ixo, tien nombre propio: l’actor Juan Echanove, un “primera linia d’o cine espanyol”, seguntes o president d’a DO, José Luis Mainar, que será l’encargau d’enchegar a Fuent d’a Mora, evento institucional con o que se da o pistoletazo de salida definitivo a la fiesta d’a vendema. D’ista forma, Echanove prene o relevo d’a exministra d’Esfensa Carmen Chacón, encargada d’o zaguer enchegue, una misión que por un regular ye reservada a o president d’a DO pero que, en os zaguers anyos, s’ha delegau en numerosas personalidatz politicas y d’o panorama social.

Tal como ha confirmau Campos, a Fiesta d’a Vendema ha iu incorporando dende 2007 intresants novedatz. Ta 2012, s’ha decidiu que o Paseu d’o Vin prencipie a suya actividat o sabado diya 1, dimpués d’os actos oficials d’a exaltación d’a uga (chafau y enchegue d’a fuent). Emulando de bella traza a la Feria d’Abril de Sevilla, “con menos bombetas”, ha bromeau, os visitants podrán desfrutar de nuevo d’a perfecta unión entre os vins d’a Denominación d’Orichen Carinyena y os platos mas deliciosos d’a nuestra tierra: magra de Teruel u ternasco d’Aragón. D’ista forma, s’ha quiesto dar bella continuidat a l’exito que obtenió o Salón d’o Vin d’as Piedras, a o que se i amanoron mas de 5.000 personas.

Obviament os caldos que componen a colección d’o Vin d’as Piedras serán presents en o Paseu d’o Vin, que o domingo diya 2 ubrirá a o publico dende as 9 d’o maitín dica as once d’a nueit.  Un evento a o que de nuevo iste anyo no se podrán amanar os visitants en o conoixiu ‘Tren d’o Vin’, que deixó de dar servicio fa tres anyos “por razons lochisticas y economicas”, ha confirmau Campos.

A DO Carinyena no atura de creixer

A Fiesta de Vendema no atura de creixer en repercusión, d’igual forma que lo fan as cifras que manulla a DO, que preveye embotellar iste anyo amán de 65 millons de botellas, si as previsions no fallan d’aquí a cabo d’anyo. “Nos queda recorriu por o que fa a la venda de vins”, ha confirmau José Luis Mainar. Una situación que, entre atras cosetas, ye posible gracias a las nuevas superficies d’as que desfruta a DO y a os treballos de reestructuración d’hectarias, gracias a os quals se ye rechovenecendo gran parte d’os vinyeros.

Gracias a o mimo d’os agricultors y a las inversions ta evitar as conseqüencias d’as plagas y d’a sequera, a Denominación d’Orichen Carinyena calcula que tendrá ‘finiquitada’ a vendema a meyaus u finals d’octubre. D’ista forma, as botellas de vin podrán prencipiar a viachar t’os suyos multiples destins, a mayor parte d’ells difuera d’Europa. As exportacions continan estando o gran baluarte d’os caldos de Carinyena y por ixo os reponsables d’a DO y as Administracions i embrecadas continan treballando en a potenciación de nuevas linias de negocio exterior y mantenimiento d’as que ya s’han ubierto con o paso d’os anyos. “Pareixe que i hai un estancamiento en o mercau interior y por ixo somos fendo un esfuerzo por favoreixer as exportacions”, ha revelau Luis Miguel Albarrán, director cheneral d’Alimentación y Fomento Agroalimentario d’o Gubierno d’Aragón.

Fuent: http://www.aragon2.com/n-20123-705-Denominacion_Origen_Carinena_calienta_motores_para_nueva_Fiesta_Vendimia

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.