A DGA quiere contar con as Redoladas t’o nuevo Plan de Carreteras d’Aragón

Aseguran que a suya cooperación cal de raso ta executar uns treballos que tienen por obchectivo amillorar a vertebración de todas as localidatz d'Aragón

Dende que o Gubierno d’Aragón dio carpetazo definitivo a o Plan Ret de Carreteras, que heba disenyau o PSOE en l’anterior lechislatura, l’Executivo camina a vueltas con os detals d’o nuevo Plan de Carreteras t’o Desembolique Socieconomico y a Seguridat Vial en Aragón (2013-2024), en o que l’Executivo treballa con a intención d’invertir dica 1.387 millons en as vías aragonesas, amás, seguntes os suyos plans, iste plan daría treballo a unas 475 personas.

Un plan que tien como obchectivo, entre atras cosas, empentar o desembolique socioeconomico y l’emplego de conchunta con a millora d’a vertebración d’o territorio a traviés d’o sistema de ciudatz prencipals d’Aragón y la apuesta decidida por l’accesibilidat ta todas as cabeceras comarcals. Por istos motivos, a DGA quiere contar con a opinión y a colaboración de todas as redoladas cara a elaborar o Plan definitivo. Asinas l’han comunicau Antonio Suárez, consellero d’Interior, y Rafael Fernández d’Alarcón, titular d’Obras Publicas, a totz os presidents comarcals. Una reunión en a que totz dos han asegurau que o Plan trazau suposará una millora de l’accesibilidat sobre o 84% d’a población y una inversión meya por habitants de mas de 695 euros.

“Ye un plan de mas de 1.380 millons d’euros de gasto y inversión en carreteras, que optimiza dica o 82% en inversions y gastos de mantenimiento necesarios y focaliza en as carreteras mas necesarias t’o desembolique economico y l’emplego d’Aragón y t’a seguridat viaria”, ha explicau Fernández d’Alarcón sobre l’hereu d’o Plan Ret. O consellero d’Obras Publicas ha estimau oportuna a colaboración d’as redoladas en considerar que se tracta d’un ret “estructurant que nos compete a nusatros pero ha d’estar completada con o ret que cada redolada ameniste”.

Cifras concretas

En a previsión inicial s’apunta a una partida d’1.387 millons ta totz os anyos que dure o prochecto. De totz ells, 519 s’adedicarían a mantenimiento y a conservación y 586 a obras de construcción y millora. Todas dos son as partidas mas grans y en as que mas inversión s’amenista.

Iste Plan alazeta o suyo disenyo en a millora d’as relacions entre as ciudatz con mayor potencial de desembolique y creyación d’emplego que son Zaragoza, Uesca, Teruel, Alcanyiz, Balbastro, Calamocha, Calatayut, Exeya d’os Caballers, Fraga, Chaca, Monzón y Tarazona, sin ixublidar a millora de l’accesibilidat ta todas as cabeceras comarcals, y ta puestos d’Aragón que presentan caracteristicas de notable u deseyable afluencia turistica. Tot ixo se reyaliza a traviés d’un ‘ret mallau estructurant’. Asinas mesmo, desembolica inversions en forma de nuevos trazaus y refuerzos de carreteras existents en as vías que unen ixos nuclios entre sí y con atras arias de l’exterior d’Aragón.

Fuent: http://www.aragon2.com/n-20197-2-DGA_quiere_contar_Comarcas_para_nuevo_Plan_Carreteras_Aragon

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.