A DPH apanyará una trentena de carreteras afectadas por o temporal d’octubre

Antonio Cosculluela, president d'a Diputación Provincial de Uesca, ha sinyalau que se destinarán mas de 2,8 millons ta que as vías afectadas puedan recobrar antes con antes a normalidat

A Diputación Provincial de Uesca (DPH) tien previsto destinar mas d’un millón d’euros ta restablir “a normalidat en as infrastructuras viarias” que sufrioron mayors mals en o temporal que azotó a provincia o pasau mes d’octubre. D’ista traza, os accesos a os territorios mas afectaus podrán recuperar china-chana a normalidat. En primeras, s’actuará en una trentena de vías, que s’unirán a las que o Gubierno d’Aragón tien previsto apanyar.

Istas obras d’acondicionamiento y reparación se contemplan en l’aduya total de 2,8 millons d’euros que a Diputación aprebó en o suyo momento ta dar a cobertura necesaria a os lugars afectaus. Seguntes confirman fuents d’a DPH, as actuacions se centrarán en as zonas de Chacetania, Alto Galligo, Plana de Uesca y Sobrarbe encara que matizan que “cal realizar atros treballos en vías d’atras tres redoladas que tamién presentan problemas”.

I hai mas de 15 carreteras provincials afectadas por as plevias, y en as que se ferán intervencions. Asinas a HU-V-3003 a Xavierre-Latre dende a A-1205 s’inundó en o cruce con l’autonomica, que o suyo puent se troba escavonau y o pavimento en mal estau; a HU-V-2024 d’Ansó ta Zuriza, amás de estricallos en o pavimento y muros, sufrió a caita d’arbols en a calzada. En a suya mayor parte as actuacions habrán de fer frent a la erosión de pavimentos, deterioros en as obras de fabrica, marguins engaronadas, espaldaduras y deslizamientos producius por l’arrocegue d’as auguas. Se contemplan en as carreteras HU-V-2201 en o municipio de Borau; HU-V-9331 en A Puebla de Fantova; HU-V-3241 Apiés-Nueno; a HU-V-8103 en Bunyals; HU-V-8611 Alcoleya- Chalamera; as HU-V-3313 y HU-V-3141 ta Castillón d’Arbaniés y Lierta respectivament; HU-V-8102 y HU-V-8101 en os municipios de Monflorite y Vicient; HU-V-3011 de Navasa; a HU-V-3243 en Santolaria d’a Penya, HU-V 3001 Rasal ta Penya; a HU-V-9601 en a Val de Bardaixí y a carretera provincial Plan-Chistén, a on s’habrá d’actuar en as calzadas, marguins y muros d’escollera.

Istas obras d’emerchencia, con un importe de mas d’un millón d’euros, se completan con atras aduyas a os municipios dica completar a partida extraordinaria de 2, 8 millons d’euros d’a Diputación Provincial ta paliar istos mals.

Fuent: http://www.aragon2.com/n-20457-2-DPH_arreglara_treintena_carreteras_afectadas_temporal_octubre

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.